લોલમ લોલ / મ્યુનિ. કોર્પોરેશનમાંથી પસંદ કરાયેલા ૧૫ આસિ. કમિશનર પૈકી માત્ર એક પાસે ટેકનિકલ બેકગ્રાઉન્ડ

• સૌથી વધુ ફરિયાદ ઈજનેર વિભાગમાં  
• ટેકનિકલ ડિગ્રી ધરાવતા અધિકારીઓની કમી

મ્યુનિસિપલ તંત્ર દ્વારા કોર્પોરેશનમાંથી ૧પ ઉમેદવારમાંથી આસિસ્ટન્ટ મ્યુનિ. કમિશનરની ફરજ માટે પસંદ કરાયા છે. જે પૈકી વિજિલન્સ વિભાગના રાહુલ શર્મા એક માત્ર ટેકનિકલ ડિગ્રીધારી આસિસ્ટન્ટ કમિશનર છે. વહીવટી તંત્ર દ્વારા તમામ આસિસ્ટન્ટ મ્યુનિ. કમિશનરને બે બે વોર્ડની ફરજ સોંપાય તેવી ચર્ચા વચ્ચે જ્યારે વોર્ડમાં ઇજનેર વિભાગને લગતા નળ, ગટર અને રસ્તાના પ્રશ્નો સૌથી વધુ રહેતા હોવાથી એક માત્ર ટેકનિકલ ડિગ્રીધારી આસિસ્ટન્ટ મ્યુનિ. કમિશનરની મદદથી વોર્ડના પ્રશ્નો કેવી રીતે ઉકેલાશે જેવી પણ ચર્ચા ઉઠી છે. 

નવા આસિસ્ટન્ટ મ્યુનિ. કમિશનરને જે ઝોનનો હવાલો ઇન્ચાર્જ ડેપ્યુટી કમિશનર પાસે
દરમ્યાન નવા આસિસ્ટન્ટ મ્યુનિ. કમિશનરને જે ઝોનનો હવાલો ઇન્ચાર્જ ડેપ્યુટી કમિશનર પાસે છે તેવા ઝોનમાં ફરજ માટે મૂકવાની પ્રાથમિકતા અપાય તેવી શક્યતા છે. મધ્ય ઝોનમાં સૌરભ પટેલ, દક્ષિણ ઝોનમાં પરાગ શાહ, દક્ષિણ-પશ્ચિમ ઝોનમાં વિજય ખનામા પાસે ઇન્ચાર્જ ડેપ્યુટી કમિશનરનો હવાલો છે આ ત્રણ ઝોનને મ્યુનિસિપલ કમિશનર વિજય નહેરા વોર્ડ લક્ષી કામકાજ માટે વધુ પ્રાધાન્ય આપે તેવી સંભાવના છે. 

આ દરમ્યાન દેવેન ભટ્ટ અને રાહુલ શાહ આ બે આસિસ્ટન્ટ મ્યુનિ. કમિશનરને પ્રમોશનવાળી જગ્યાએ હાજર થયા પછી બે દિવસમાં સીધી ભરતીમાં હાજર થવાની ફરજ પડાઇ હોવાની મ્યુનિસિપલ વર્તુળોમાં ચર્ચા ઊઠી છે.