બેદરકાર તંત્ર / અમદાવાદ સોલા સિવિલની ખબર તો કાઢો, "બીમાર" હોસ્પિટલમાં 5 દિવસથી તમામ પ્રકારના ઓપરેશન બંધ

• સોલા સિવિલમાં AC પ્લાન્ટ બંધ થવાનો મામલો  
• કોન્ટ્રાક્ટરનો સિવિલ હોસ્પિટલ તંત્ર પર મોટો આરોપ
• દોઢ વર્ષથી પેમેન્ટ ન મળ્યું હોવાનો આક્ષેપ

અમદાવદની સોલા સિવિલ હોસ્પિટલમાં છેલ્લા 5 દિવસથી એસી બંધ છે. જેના કારણે ઓપરેશન અને સર્જરીઓ પણ બંધ રહેતા દર્દીઓના જીવ જોખમમાં મુકાયા છે. જ્યારે બીજી તરફ ઊંઘતા તંત્રનું કે, રાજ્યના આરોગ્ય મંત્રીના પેટનું પાણી સુદ્ધા હલતું નથી. એવી પણ માહિતી છે કે, બિલ ન ભરાતા એસી બંધ કરી દેવામાં આવ્યા છે. 

સોલા સિવિલમાં 5 દિવસથી AC બંધ  

સોલા સિવિલ હોસ્પિટલમાં સત્તાધિસો અને કોન્સ્ટ્રાક્ટરોની મિલિભગત વચ્ચે છેલ્લા 5 દિવસોથી દર્દીઓના જીવ જોખમમાં મુકાયા છે. કારણ કે, કોન્ટ્રાક્ટરોએ બિલ ન ભરતા સોલા સિવિલના મોટા ભાગના એસી બંધ થઈ ગયા છે. જેના કારણે ઓપરેશન અને સર્જરી થઈ શક્તિ નથી. આ સ્થિતિમાં અનેક દર્દીઓએ જીવ પણ ગુમાવવો પડી શકે તેવી સ્થિતિ પૈદા થઈ છે.  

જોકે એસી બંધ કરવા બાબતે ખુબ મોટા આક્ષેપ પણ સામે આવ્યા છે. AC પ્લાન્ટ ચલાવતી કોન્ટ્રાક્ટ કંપનીનું કહેવું છે કે, છેલ્લા દોઢ વર્ષથી PIU વિભાગે અમારું બિલ ચૂકવ્યું નથી. સપ્ટેમ્બર-2019થી અત્યાર સુધીનું અમારું 55 લાખ રૂપિયાથી વધુનું બિલ બાકી છે. આ અંગે અમે સોલા સિવિલના સુપરીટેન્ડેન્ટથી લઈને ગાંધીનગર સુધી રજૂઆતો કરી છતાં કોઈ જવાબ નથી આપતું.

અનેક દર્દીઓ જીવન-મરણ વચ્ચે જોલા ખાય છે તેમને કાંઈ થયું તો કોણ જવાબદાર? ACના કારણે ઓપરેશન અને સર્જરી બંધ છે તો કોણ જવાબદાર? કેમ કોન્ટ્રાક્ટ કંપનીનું લાખો રૂપિયાનું બિલ નથી ચૂકવાયું? રજૂઆતો છતાં કેમ સિવિલના સત્તાધિશો અને આરોગ્યમંત્રી સાંભળતા નથી? સવાલો અહીં અનેક છે. પરંતુ હાલ તો સોલા સિવિલમાં દાખલ દર્દીઓના જીવનનો સવાલ છે.