શૈક્ષણિક / કેન્દ્રીય યુનિવર્સિટીઓની પેન્ડીંગ જગ્યાઓ ભરવા સરકારે જાહેર કરી ડેડલાઈન, શિક્ષણમંત્રીનો લોકસભામાં જવાબ

• કેન્દ્રીય શિક્ષણમંત્રી ધર્મેન્દ્ર પ્રધાને લોકસભાને કહ્યું 
• કેન્દ્રીય યુનિવર્સિટીઓમાં ખાલી જગ્યાઓ 12 મહિનામાં ભરાશે 
• એસસી/એસટી/ઓબીસીની ખાલી જગ્યાઓ ભરવાના પ્રયાસો ચાલુ છે

સેન્ટ્રલ યુનિવર્સિટીઝ (સુધારા) બિલ પર ચર્ચા દરમિયાન શિક્ષણ પ્રધાન ધર્મેન્દ્ર પ્રધાને ખાલી જગ્યાઓ ભરવા સંબંધિત એક મહત્વનું નિવેદન આપ્યું છે. ધર્મેન્દ્ર પ્રધાને લોકસભામાં જણાવ્યું હતું કે વિવિધ કેન્દ્રીય યુનિવર્સિટીઓમાં અનામત વર્ગ સહિતની તમામ બાકી ખાલી જગ્યાઓ આગામી 12-18 મહિનામાં ભરવામાં આવશે. તેમણે કહ્યું હતું કે, સમાજના વંચિત વર્ગો માટે ઘણી ખાલી જગ્યાઓ અનામત રાખવામાં આવી છે.

એસસી/એસટી/ઓબીસી માટે અનામતની જગ્યાઓ ભરાશે 
પ્રધાને કહ્યું કે કેન્દ્રીય યુનિવર્સિટીઓમાં એસસી/એસટી/ઓબીસી અને આર્થિક રીતે નબળા વર્ગ (ઇડબલ્યુએસ) માટે અનામત તમામ બાકી રહેલી ખાલી જગ્યાઓ ભરવાના પ્રયાસો ચાલુ છે. એક વિશેષ ઝુંબેશ હાથ ધરવામાં આવી છે અને મિશન મોડમાં ભરતી કરવામાં આવશે. આગામી દોઢ વર્ષમાં બાકી રહેલી ખાલી જગ્યાઓ ભરવામાં આવશે.

All pending vacancies, including for reserved category, in various central universities will be filled in next 12-18 months: Education Minister Dharmendra Pradhan

— Press Trust of India (@PTI_News) August 3, 2022

યુનિવર્સિટીઓમાં 6,000 પ્રોફેસરની જગ્યાઓ ખાલી 
વિવિધ કેન્દ્રીય યુનિવર્સિટીઓમાં લગભગ 6,000 પ્રોફેસરની જગ્યાઓ ખાલી છે. શિક્ષણ મંત્રાલયે રાજ્યસભાને માહિતી આપી હતી કે, 23 ઇન્ડિયન ઇન્સ્ટિટ્યૂટ ઓફ ટેકનોલોજી (આઇઆઇટી)માં 4,500થી વધુ ફેકલ્ટીની જગ્યાઓ ખાલી છે. સંસદના ઉપલા ગૃહ સાથે શેર કરવામાં આવેલા આંકડા મુજબ, ખડગપુરમાં આઈઆઈટીમાં 798 જગ્યાઓ ખાલી છે અને 517 ખાલી જગ્યાઓ સાથે બોમ્બેમાં સૌથી વધુ ફેકલ્ટી પદ ખાલી છે. ટોચની ક્રમાંકિત આઇઆઇટી-મદ્રાસમાં પણ ફેકલ્ટીની 482 જગ્યાઓ ખાલી છે. આઈઆઈટીમાં અધ્યાપનની કુલ 4,596 જગ્યાઓ ખાલી છે. કેન્દ્રીય શિક્ષણ રાજ્યમંત્રી સુભાષ સરકારે લેખિત જવાબમાં જણાવ્યું હતું કે, 'ખાલી જગ્યાઓ ભરવી એ સતત પ્રક્રિયા છે અને આઇઆઇટી રોલિંગ જાહેરાતો જારી કરે છે, જે આઇઆઇટીમાં ફેકલ્ટી હોદ્દા માટે જરૂરી લાયકાત અને અનુભવ પૂર્ણ કરનારા તમામ ઉમેદવારો માટે આખું વર્ષ ખુલ્લી રહે છે.