દેશની સૌથી મોટી હોસ્પિટલ એમ્સે ચામડીના રોગો અને મોંઢાના કેન્સરના નિદાન માટે એક મોબાઈલ એપ લોન્ચ કર્યું છે.
દિલ્હીની એમ્સે લોન્ચે કર્યું મોબાઈલ એપ
મોબાઈલ એપની મદદથી ચામડીની બીમારીઓનું થઈ શકશે નિદાન
મોંઢાના કેન્સરની પણ થઈ શકશે ઓળખ
વિશ્વભરમાં કુલ મૃત્યુમાંથી લગભગ 2% મૃત્યુ ચામડીના રોગો સાથે સંબંધિત છે. હેલ્થ એક્સપર્ટ્સનું કહેવું છે કે જો સમયસર આ સમસ્યાઓની ઓળખ કરવામાં આવે તો તેની ગંભીરતા અને જીવલેણ સ્થિતિનું જોખમ ઘટાડી શકાય છે. જો કે ભારતમાં મોટા ભાગના કેસમાં ત્વચા સંબંધી સમસ્યાઓનું નિદાન સમયસર થતું નથી જેના કારણે આ સમસ્યા વધી જાય છે.
દિલ્હીની એમ્સે શરુ કર્યું મોબાઈલ એપ
ઓલ ઇન્ડિયા ઇન્સ્ટિટ્યૂટ ઓફ મેડિકલ સાયન્સિસ (એઇમ્સ)એ એક મોબાઇલ એપ્લિકેશન શરૂ કરી છે, જેની મદદથી ત્વચાને લગતા રોગો, ઓરલ-સ્કિન કેન્સરનું પણ સરળતાથી નિદાન થઈ શકે છે. આ આર્ટિફિશિયલ ઇન્ટેલિજન્સ આધારિત મોબાઇલ એપને એઇમ્સ-દિલ્હી અને સ્ટાર્ટ-અપ ન્યુટ્રિશન લેબ દ્વારા સંયુક્ત રીતે વિકસાવવામાં આવી છે. નિષ્ણાતોનું કહેવું છે કે આ એપની મદદથી ત્વચાના રોગોની સમયસર ઓળખ કરીને તેની સારવારમાં મદદ કરી શકાશે. નિષ્ણાતોનો દાવો છે કે ડોકટરો માટેની આ એપ્લિકેશન ત્વચાની સ્થિતિને સરળતાથી સમજવામાં ખૂબ મદદરૂપ થઈ શકે છે.
ત્વચા અને મોઢાના કેન્સરના રોગોનું થઈ શકે છે નિદાન
નિષ્ણાતોએ જણાવ્યું હતું કે, DermaAid નામની આ એપ્લિકેશન મશીન-લર્નિંગ એઆઇ-સંચાલિત એલ્ગોરિધમ્સનો ઉપયોગ કરીને ત્વચાની સમસ્યાઓને ઓળખી શકે છે. એઇમ્સના વેનોલોજી અને ડર્મેટોલોજી વિભાગના પ્રોફેસર ડો.સોમેશ ગુપ્તાએ જણાવ્યું હતું કે પ્રાથમિક અભ્યાસમાં તેની ચોકસાઈ 80 ટકા સુધી જોવા મળી છે. ચામડીના રોગોના નિદાનમાં તેની મહત્વપૂર્ણ ભૂમિકા હોઈ શકે છે.
કેવી રીતે કામ કરશે એપ?
મોબાઈલ એપ વિશે શેર કરવામાં આવેલી જાણકારી અનુસાર, તેનો ઉપયોગ એકદમ સરળ અને અસરકારક હોઈ શકે છે. ચામડીની સ્થિતિ અને રોગો વિશે જાણવા માટે ડોક્ટરે દર્દીના શરીર પરના ઘા કે ચામડીના વિકારની તસવીર લેવી પડશે અને તેને ક્લાઉડ સર્વર પર અપલોડ કરવું પડશે. અપલોડ કર્યાની 15-30 સેકન્ડની અંદર એપ મશીન એનાલીસીસ આધારિત ફોટા આપશે જેના આધારે સમસ્યાની ઓળખ કરી શકાશે. ફંગલ ઇન્ફેક્શનથી માંડીને ખરજવું અને સ્કિન કેન્સર સુધીની સમસ્યાઓ આ એપની મદદથી સરળતાથી જાણી શકાય છે.
ચામડીના રોગો અને મોંઢાનું કેન્સર જાણી શકાશે
પ્રોફેસર ડો.સોમેશ ગુપ્તાએ જણાવ્યું હતું કે આ એપ્લિકેશન ખીલ, સોરાયસિસ, પાંડુરોગ, ટિનાઆ, ખરજવું, બેસલ સેલ કાર્સિનોમા, સ્ક્વોમસ સેલ કાર્સિનોમા, મેલાનોમા સહિત સ્ક્વોમસ સેલ કાર્સિનોમા જેવા કેન્સરને ઓળખવામાં લગભગ 80 ટકા ચોકસાઈ સાથે અસરકારક સાબિત થઈ છે.