અમદાવાદ / માવો પડ્યો 27 લાખમાં: પાનના ગલ્લે મસાલો લેવા જવું આ શખ્સને પડ્યું ભારે, કિસ્સો વાંચીને ચોંકી ઉઠશો

• એક પાન મસાલો 27 લાખ રૂપિયામાં પડ્યો  
• આંગળીયા કર્મચારી પાન મસાલો ખાવા પાર્લરમાં ગયો અને ગઠિયા થેલો લઈ ફરાર 
• સીસીટીવી ફૂટેજના આધારે ગઠિયાઓને શોધવા તપાસનો ધમધમાટ 

પાનમસાલાની તલબ પણ ગજબ હોય છે, અમદાવાદના વાડજ વિસ્તારમાં રૂપિયા 27 લાખના દાગીના ભરેલી બેગ એક્ટિવામાં રેઢી મૂકી આંગડિયા પેઢીનો કર્મચારી પાન પાર્લર પર મસાલો ખાવા ગયો અને ગણતરીની મિનિટોમાં જ ગઠિયા એક્ટિવામાં રાખેલ થેલો લઈ ફરાર થઇ જતા ચકચાર મચી જવા પામી છે.

ગણતરીની મિનિટમાં લાખોના દાગીના ભરેલ બેગની ચોરી

આ અંગેની વિગત એવી છે કે અમદાવાદના માણેકચોકમાં રહેતા દેવાભાઈ ઠાકોર છેલ્લા 12 વર્ષથી પટેલ અમૃતભાઈ કાંતિલાલ એન્ડ કુ. નામની આંગડિયા પેઢીમાં ડિલિવરી મેન તરીકે નોકરી કરી રહ્યા છે. તેવામાં ગઈકાલે સાંજે તેઓ નવા વાડજ શ્રી રત્ન કોમ્પ્લેક્ષ ખાતેની પોતાની ઓફિસે આવ્યા હતા. જ્યા પાર્સલો લીધા બાદમાં પાર્સલો એક બેગમાં મૂકીને તેઓ આઠેક વાગ્યાના સમયગાળા દરમિયાન બેગ એકટીવામાં મૂકી સહકર્મચારી કનુભાઈ પ્રજાપતિ સાથે એક્ટીવા માણેકચોક ગયા હતા. આ દરમિયાન બાદમાં આંગડિયા પેઢીના કર્મચારી દેવાભાઈ ઠાકોરને પાન મસાલાની તલબ લાગતા તેઓ તેમની ઓફિસની સામેના સોનલ પાન પાર્લર પર એક્ટિવા ઉભુ રાખી દુકાને મસાલો લેવા ગયા હતા. આ વેળાએ બે અજાણ્યા બાઈક સવારોની નજરમાં થેલો ચડી જતા ગણતરીની મિનિટમા તો એક્ટિવાના આગળના ભાગે રાખેલી પાર્સલ ભરેલી બેગ લઈને આરોપી ભાગી છૂટયા હતા.

બેગમાં 27 લાખના સોનાના દાગીના હોવાનો દાવો
જોકે, દેવાભાઈ ઠાકોરે પોતે છેતરાયા હોવાનો અહેસાસ થતા ગઠિયાઓનો પીછો કર્યો હતો, પરંતુ ગઠીયા ઝપટે ચડયા ન હતા. ઉલ્લેખનીય છે કે પાર્સલ ભરેલી બેગમાં રૂપિયા 27 લાખના સોનાના દાગીના હોવાનો દાવો કરવામાં આવી રહ્યો છે. આ સમગ્ર મામલે પોલીસને જાણ કરવામાં આવતા ક્રાઈમ બ્રાન્ચ સહિતનો પોલીસ કાફલો ઘટના સ્થળે દોડી ગયો હતો. જ્યા સીસીટીવી ફૂટેજ ચેક કરી પોલીસે તપાસના ચક્રો ગતિમાન કર્યા છે.