અમદાવાદઃ શહેરનાં વસ્ત્રાપુર વિસ્તારમાં દારૂની મહેફિલમાં ઝડપાયેલ આરોપીઓનાં ફોટા વાયરલ થયાં છે. જેમાં તેઓ પોલીસ સ્ટેશનમાં જ સેલ્ફી લેતાં જોવાં મળી રહેલ છે. આરોપીએ પોલીસની કેપ પહેરીને ફોટો પડાવ્યાં છે. વસ્ત્રાપુર પોલીસ સ્ટેશન વિથ ગેંગનાં નામથી પોસ્ટ પણ કરી છે. આ આરોપીઓની સેલ્ફી સોશિયલ મીડિયામાં પણ વાયરલ થઇ છે.
ઉલ્લેખનીય છે કે ગુરૂકુળ ફ્લેટમાં જ્યારે પોલીસે દારૂની મહેફિલ માણી રહેલ યુવક-યુવતી સહિત 25 લોકોની ધરપકડ કરી હતી. ત્યાર બાદ તેઓને પોલીસ સ્ટેશન ખાતે લઇ જવાયા હતાં.
પરંતુ આ યુવક-યુવતીઓ પોતાનું જાણે કંઇક સ્ટેટસ હોય તે રીતે પોલીસ સ્ટેશનમાં તેઓએ સેલ્ફી લીધી હતી અને બાદમાં તેને સોશિયલ મીડિયા પર પોસ્ટ પણ કરી હતી. જેમાં સ્પષ્ટપણે જોવાં મળી રહેલ છે કે જાણે તેઓ પોલીસનાં હાથે ઝડપાઇને ખુશી અનુભવી રહ્યાં છે.
સળગતા સવાલઃ
કોણ છે બેદરકારી દાખવનારા અધિકારી?
શું આ આરોપીઓને પોલીસ સ્ટેશનમાં સાચવવામાં આવ્યાં છે?
આરોપીઓને કોણે આપી પોલીસની કેપ?
શું આ આરોપીઓ કોઇ વગદાર છે?
સેલ્ફી પોસ્ટ કરી આરોપીઓ શું સાબિત કરવા માંગે છે?
પોલીસ સ્ટેશનમાં આરોપીઓની કોણે કરી સરભરા?
એવું લાગી રહ્યું છે કે જાણે હવે લોકોને કાયદા વ્યવસ્થાનો ડર જ નથી રહ્યો અને દારૂ પીવાને તો પોતે સ્ટેટસ માની રહ્યાં છે. તેવું આ આરોપીઓની સેલ્ફી પરથી સ્પષ્ટ થઇ રહ્યું છે. તેમાંય આ ઘટનામાં સૌથી મોટો મુદ્દો તો એ છે કે એક ઇન્દર નામનો આરોપી કે જે એક પોલીસ કર્મચારીની કેપ પહેરીને પોતે સેલ્ફી પડાવે છે અને સાથે સાથે સોશિયલ મીડિયા પર તેનો ફોટો પણ વાયરલ કર્યો છે. ત્યારે પોલીસ સ્ટેશનનાં અધિકારીઓ માટે આ એક મોટો પ્રશ્ન છે.
આ ઘટનાને લઇ પોલીસ કર્મચારીઓને લઇને તેમજ કાયદાકીય વ્યવસ્થા સામે પણ અનેક એવાં સવાલો ઉભાં થાય છે કે જ્યારે આરોપીઓ પોલીસ સ્ટેશનમાં સેલ્ફી પડાવી રહ્યાં હતાં તેવાં સમયે આખરે પોલીસ શું કરી હતી તેમજ પોલીસ સ્ટેશનમાં આ આરોપીઓની સરભરા કોણે કરી આ આરોપીઓ શું કોઇ મોટા વગદાર છે જેવાં અનેક સવાલો ઉભાં થાય છે.