બ્રિટિશ કાઉન્સિલ અમદાવાદ દ્વારા હાલમાં જ શહેરીજનોનાં વાંચનને લઈને કેટલાક રસપ્રદ તારણો જાહેર કરવામાં આવ્યાં છે. જે મુજબ અમદાવાદી યુવાનો સર આર્થર કોનન ડાયલ લિખિત શેરલોક હોમ્સ શ્રેણીનાં પુસ્તકો સૌથી વધુ વાંચે છે. જ્યારે બાળકોમાં આશ્ચર્યજનક રીતે ઈટાલિયન લેખક જેરેનિમો સ્ટિલ્ટનનાં પુસ્તકો હોટ ફેવરેટ છે. હજુ બે વર્ષ પહેલાં સુધી અહીં બાળકોમાં વિખ્યાત લેખિકા જે. કે. રોલિંગનાં હેરી પોટર શ્રેણીનાં પુસ્તકોની સૌથી વધારે ડિમાન્ડ રહેતી હતી, પણ હવે તે બીજા ક્રમે ધકેલાઈ ગયાં છે.
સ્પેસ ચેઝ’ થીમ પર એક ગ્લોબલ રિડીંગ ચેલેન્જ પણ લોન્ચ
સ્પર્ધામાં 6 થી 11 વર્ષનાં બાળકો ભાગ લઈ શકશે
પુસ્તકો પૈકી કોઈપણ 6 કે તેથી વધુ પુસ્તકો 6 અઠવાડિયા સુધીમાં વાંચવાનાં રહેશે
બ્રિટિશ કાઉન્સિલનાં તારણો મુજબ અમદાવાદી બાળકોમાં હાલ ડેન બ્રાઉન લિખિત ‘દ વિન્સિ કોડ’ તથા બુકર પ્રાઈઝ વિનર એના બર્ન્સનું ‘મિલ્કમેન’ સૌથી વધુ વંચાતું પુસ્તક છે. યુવાનો અને વડીલો ફિક્શન સૌથી વધુ વાંચે છે. ત્યારબાદ મેનેજમેન્ટ, સાયકોલોજી, સેલ્ફ હેલ્પ, મોટીવેશનલ તથા IELTSની પરીક્ષાની તૈયારીઓનાં પુસ્તકોનો ક્રમ આવે છે.
બ્રિટિશ કાઉન્સિલ લાયબ્રેરીનાં એક્ટિંગ હેડ ગુંજન નરૂલાનાં જણાવ્યાનુસાર, છેલ્લાં કેટલાક સમયથી અવકાશ ક્ષેત્રે ભારતની પ્રગતિનાં સમાચારોની બાળકોમાં સારી એવી અસર થઈ છે. ચંદ્ર અને મંગળયાન સહિતનાં મિશનોને કારણે અમદાવાદી બાળકોમાં સેટેલાઈટ લોન્ચિંગ, ચંદ્રયાન મિશન, અવકાશ, બ્રહ્માંડ અને તેને લગતાં સાયન્સ ફિક્શન પુસ્તકો તથા ફિલ્મોને ખૂબ પસંદ કરવામાં આવી રહી છે.
બાળકોમાં વધી રહેલાં આ રસને ધ્યાનમાં રાખીને બ્રિટિશ કાઉન્સિલ દ્વારા માનવીએ ચંદ્ર પર પગ મૂક્યાંનાં 50 વર્ષની ઉજવણી સાથે ‘સ્પેસ ચેઝ’ થીમ પર એક ગ્લોબલ રિડીંગ ચેલેન્જ પણ લોન્ચ કરી છે. આગામી 14મી નવેમ્બરને બાળદિનથી શરૂ થનારી એ સ્પર્ધામાં 6 થી 11 વર્ષનાં બાળકો ભાગ લઈ શકશે.
જેમાં ભાગ લેનારાં બાળકોએ નિષ્ણાંતો દ્વારા પસંદ કરાયેલાં પુસ્તકો પૈકી કોઈપણ 6 કે તેથી વધુ પુસ્તકો 6 અઠવાડિયા સુધીમાં વાંચવાનાં રહેશે. જેનાં આધારે પછી તેમણે સ્ટોરી રાઈટીંગ, સ્ટોરી ટેલિંગ અને બૂક રિવ્યૂ પોતાનાં શબ્દોમાં લખવાનાં રહેશે.