અમદાવાદ / પોલીસની 'SHE' ટીમની સલાહ, કપડા-દાગીનાની ખરીદીમાં મશગૂલ મહિલાઓ આ વાતનું ધ્યાન રાખે

• દિવાળીના તહેવારને લઇ બજારોમાં ભીડ
• રાજ્યની પોલીસે હાથ ધર્યું અનોખુ અભિયાન
• મહિલા પોલીસે ફૂટ પેટ્રોલિંગ કરી મહિલાઓને ભણાવ્યા સુરક્ષાના પાઠ

શહેરમાં દિવાળીના તહેવારની ખરીદીનો માહોલ જામ્યો છે તેમાં રતન પોળ અને માણેક ચોક જેવા વિસ્તારોમાં ખાસ કરીને  મહિલા ગ્રાહકોની ભીડ વધારે જોવા મળતી હોય છે. મહિલાઓ કપડાં અને દાગીનાની ખરીદીમાં મશગૂલ હોય ત્યારે તેમના સોનાના દોરા અને કિંમતી સામાનની ચોરી અને ઉઠાંતરી થવાની શક્યતા વધી જાય છે. આથી મહિલા પોલીસ દ્વારા ભીડભાડ વાળી બજારોમાં ફૂટ પેટ્રોલિંગ શરૂ કરવામાં આવ્યું છે. 
 
મહિલાઓની સુરક્ષા માટે પોલીસે હાથ ધર્યું અનોખુ અભિયાન 

કેસરી રંગના જાકીટ પહેરીને શી-ટીમની મહિલા પોલીસકર્મી રોડ પર મળનારી પ્રત્યેક મહિલાઓને સુરક્ષા બાબતે સાવચેત રહેવા અને પોતાના કિંમતી સામાનનું ધ્યાન રાખવા સમજાવી રહી છે. ખરીદી માટે આવી રહેલી મહિલાઓએ પણ મહિલા પોલીસની આ જહેમતની પ્રશંસા  કરી હતી. 

દુકાન બહાર રહેલા CCTV ચાલુ રાખવા વેપારીઓને સૂચના

મહિલા પોલીસની ખાસ શી ટીમ દ્વાર ફૂટ પેટ્રોલિંગ દરમિયાન વેપારીઓને પણ સાવચેત રહેવાની સૂચના અપાઈ છે. પોતાની દુકાનમાં આવતા ગ્રાહકો પર નજર રહે તે માટે CCTV કેમેરા ચાલુ હાલતમાં રાખવાની પણ વેપારીઓને સૂચના આપવામાં  આવી છે. 

મહિલા પોલીસની શી ટીમ રોડ પર ફરી મહિલાઓને આપી રહી છે સુરક્ષાના પાઠ

ચોરનો ભોગ બનીને કોઈની દિવાળી બગડે નહીં તે માટે દિવાળી સુધી શહેરના ગીચ વિસ્તારોમાં પોલીસનું ફૂટ પેટ્રોલિંગ સતત ચાલુ રાખવામાં આવશે. મહિલા પોલીસની શી ટીમ રોડ પર ફરીને મહિલાઓને અને વેપારીઓને દિવાળીની ખરીદીના  સમયમાં સાવધ રહેવા સૂચનાઓ આપી  રહી છે. પરંતુ આખરી જવાબદારી તો નાગરિકની પોતાની છે. 

દરેક નાગરિકે ભીડભાડમાં અને ખરીદીમાં મશગૂલ થઈ જવાને બદલે પોતાની અને પોતાના સામાનની સુરક્ષાનો જાતે જ ખ્યાલ કરવો પડશે. નહીં તો તહેવારની ઉજવણીનો આનંદ શોકમાં ફેરવાતા વાર નહીં લાગે...