- ફાયર સેફ્ટીને લઇ અમદાવાદ ફાયર વિભાગની લાલ આંખ
- હાઇરાઇઝ રેસીન્ડેશિયલ બિલ્ડિંગને ફટકારી નોટીસ
- ફાયર NOC ને લઇ ફટકારી 247 બિલ્ડિંગને નોટીસ
તાજેતરમાં રાજ્યમાં ફાયર સેફ્ટી વગરની ઇમારતોને લઈ હાઇકોર્ટે મોટો હુકમ કર્યો હતો. આશરે પાંચ દિવાસ અગાઉ હાઇકોર્ટે NOC વગરની ઇમારતોને સીલ કરવા AMCને હુકમ કર્યો કર્યો હતો. અમદાવાદમાં કેટલીય ઇમારતો અને રહેણાંક મકાનો પાસે ફાયર NOC ન હોવાનું મનાઈ રહ્યું છે. હાઇકોર્ટના આદેશ બાદ અમદવાદમાં ફાયર સેફ્ટીને લઇ ફાયર વિભાગ આકરા પાણીએ થયો છે ફાયર સેફટીના નિયમનો ઉલાળિયો કરનાર સામે ફાયર વિભાગે લાલ આંખ કરી છે.
લાઇટ અને પાણી પુરવઠો બંધ કરવાની આપી નોટીસ
ફાયર NOC ને લઇ અમદાવાદમાં તંત્ર દ્વારા 247 બિલ્ડિંગને નોટીસ ફટકારવામાં આવી છે.ફાયર વિભાગે હાઇરાઇઝ રેસીન્ડેશિયલ બિલ્ડિંગને નોટીસ ફટકારી એન વહેલી તકે ફાયર NOC મેળવી લેવા ટકોર કરી છે.જો આ દિશામાં વહેલાસર કાર્યવાહી કરવામાં નહી આવે તો સબંધિત બિલ્ડિંગમાં લાઇટ અને પાણી પુરવઠો બંધ કરી દેવામાં આવશે. આ અંગેની નોટિસને લઈને કસૂરવારોમાં ફફડાટ ફેલાયો છે.
અગાઉ હાઇકોર્ટ કહ્યું હતું NOC વગરની ઇમારતો સીલ કરો
મહત્વનું છે કે તાજેતરમાં એક અરજદાર દ્વારા ગુજરાત હાઇકોર્ટમાં ફાયર સેફ્ટી વગરની ઇમારતોને લઈ રજૂઆત કરી હતી. જે બાદમાં ફાયર સેફ્ટી વગરની ઇમારતોના આંકડા સાંભળી કોર્ટ પણ આશ્ચર્યચકિત થઇ હતી. જેમાં અરજદારે રજૂ કરેલા આંકડા મુજબ અમદાવાદ શહેરમાં કુલ 1126 રહેણાંક બિલ્ડિંગ અને 26 કોમર્શિયલ બિલ્ડીંગો પાસે ફાયર NOC ન હોવાનો ઉલ્લેખ કરાયો હતો. અરજદારે હાઇકોર્ટમાં ફાયર સેફ્ટી વગરની ઇમારતોના રજૂ કરેલ આંકડાને લઈ હાઇકોર્ટે મોટો હુકમ કર્યો હતો. હાઇકોર્ટે અમદાવાદ મ્યુનિશિપલ કોર્પોરેશનને NOC વગરની ઇમારતો સીલ કરવા હુકમ કર્યો હતો. આ સાથે ફાયર સેફ્ટી ન હોય તેની સામે કડક પગલં લેવા HCએ ટકોર કરી હતી. જેને પગલે ફાયર NOC ને લઇ શહેરની 247 બિલ્ડિંગને નોટીસ ફટકારવામાં આવી હોવાનું મનાઈ રહ્યું છે.
