હત્યા / અમદાવાદમાં ઘરકંકાસનો કરુણ અંત: શંકાશીલ સ્વભાવના પતિએ પત્નીને પહોંચાડી પરલોક, પોલીસ સ્ટેશનમાં સામેથી જઈ ગુનો કબૂલ્યો

• અમદાવાદમા પતિ-પત્નીના સંબધનું ફરી એક વખત ખૂન
• પતિએ દોરીથી ગળું દબાવીને પત્નીની કરી હત્યા 
• ત્રણ માસ અગાઉ પણ કર્યો હતો હત્યાનો પ્રયાસ

અમદાવાદમા પતિ-પત્નીના સંબધનું ફરી એક વખત ખૂન થયું હોવાનો કિસ્સો સામે આવતા સનસનાટી મચી જવા પામી છે. સાણંદમાં ઝઘડામાં ઉશ્કેરાઈ ગયેલા પતિએ દોરીથી ગળું દબાવીને પત્નીની હત્યા કરી દીધી હતી. જેને લઇને પોલીસને જાણ કરાતા પોલીસે આરોપી પતિની ધરપકડ કરી કાર્યવાહી હાથ ધરી હતી.

આરોપીએ પોલીસ મથકે પહોંચી હત્યાની કરી કબૂલાત
આ કેસની જણાવા મળતી વિગત અનુસાર વિકૃત અને શંકાશીલ માનસિકતા ધરાવતા અશોક રાણા અને તેમની પત્ની ડિમ્પલ વચ્ચે અવાર નવાર ઝઘડા થતા હતા. ગઈ કાલે સાંજે પણ ડિમ્પલબેન પોતાના ઘરમાં કામ કરી રહ્યા હતા ત્યારે માથાના વાળમાં કલર લગાવવા બાબતે પતિ પત્ની વચ્ચે તકરાર થઈ ગઇ હતી અને ઉશ્કેરાયેલા અશોકે પત્નીને ધક્કો મારીને નીચે પાડી દીધી હતી એટલું નહીં પિત્તો ગુમાવી બેઠેલા આરોપી પતિએ દોરડા વડે પત્નીનું ગળું દબાવી દઇ મોતને ઘાટ ઉતારી દીધી હતી. આ હત્યા કર્યા બાદ આરોપી પતિ પોલીસ સ્ટેશનમાં પહોંચ્યો અને પત્નીની હત્યા કરી હોવાનું કબૂલાત કરી હતી. આ ઘટનાને પગલે પોલીસ સ્ટાફ પણ ચોંકી ઉઠ્યો હતો અને ઘટનાસ્થળે પહોંચીને હત્યાનો ગુનો નોંધ્યો હતો. આ ઘટનાને લઇને પરિવાર આઘાતમા શરી પડ્યો છે અને આરોપીને આકરામા આકરી સજા કરવામા આવે તેવી માંગ ઊઠવાઇ રહી છે. 
 
ત્રણ માસ પહેલા આરોપી પતિએ ગળું દબાવીને હત્યાનો પ્રયાસ કર્યો હતો
20 વર્ષ પહેલાં અશોક રાણા અને ડિમ્પલબેનના લગ્ન થયા હતા. બંનેને 2 દીકરા છે. અશોક ફોટોગ્રાફરનું કામ કરે છે અને સાણંદમાં શ્યામ હિલ્સમાં રહે છે. અશોકભાઈનો શકાશીલ સ્વભાવના કારણે બન્ને પતિ પત્ની વચ્ચે અનેક વખત ઝઘડા થતા હતા. ત્રણ માસ પહેલા પણ અશોક અને ડિમ્પલ બેન વચ્ચે ઝઘડો થતા અશોક એ ડિમ્પલને ખુબ જ માર માર્યો અને ગળું દબાવીને હત્યાનો પ્રયાસ કર્યો.પરંતુ ડિમ્પલ બેન પોતાના પિયર આવી ગયા હતા. દોઢ માસ રિસાઈને બેઠા હતા. પરંતુ બે દીકરા મોટા હોવાથી સમાજ અને પરિવારને સમજાવતા ફરી પતિના ઘરે આવી ગયા હતા. પરંતુ પતિ અશોકનો શકાશીલ અને વિકૃત સ્વભાવનો ભોગ ડિમ્પલ બેનને બનવું પડ્યું અને પોતાનો જીવ ગુમાવવાનો વારો આવ્યો હતો.હાલ સાણંદ પોલીસે હત્યાના ગુના હેઠળ આરોપી અશોકની ધરપકડ કરીને વધુ તપાસ શરૂ કરી છે.