પ્રેરણા / અમદાવાદમાં આ ગ્રૂપ ગરમીમાં ટ્રાફિક કર્મચારીઓને એનર્જી ડ્રિન્ક સર્વ કરે છે

આ ગ્રૂપના સભ્યો ટ્રાફિક જંક્શન પર ફરજ બજાવતા ટ્રાફિક કર્મચારીઓને ઠંડું ઓરેન્જ ગ્લુકોઝ સર્વ કરવાની કામગીરી ગરમીના બે માસ દરમિયાન નિયમિત રીતે કરે છે. ઓરેન્જ એલર્ટ કોર ટીમનાં સભ્ય ગ્રીષ્મા શાહે જણાવ્યું હતું કે એક સમયે કાળઝાળ ગરમીમાં જ્યારે તેઓ ટ્રાફિક જંક્શન પર ઊભાં રહ્યાં હતાં ત્યારે તેમની કારમાં એસીની ઠંડક હતી, પરંતુ જંક્શન પર ફરજ બજાવી રહેલા ટ્રાફિક કર્મચારી ગરમીથી ત્રસ્ત થઇને પસીનો વહાવી રહ્યા હતા.

બસ, આ જ કારણથી આ ચેરિટી પ્રોજેક્ટ અમલમાં આવ્યો અને આ કર્મચારીઓને ગરમીમાં રાહત આપતું એનર્જી ડ્રિન્ક સર્વ કરવાનું આયોજન કરાયું. ગ્રીષ્મા શાહની સાથે બિઝનેસમેન હર્ષિલ પંચાલ અને જિગર ત્રિવેદી જોડાયા છે કે જેઓ છેલ્લાં ર૦ વર્ષથી આ પ્રકારનાં સામાજિક કાર્યો કરી રહ્યા છે. ઓરેન્જ ગ્રૂપ આ માટેની નાણાકીય સહાય સોશિયલ મીડિયા કેમ્પેન, સ્પોન્સર્સ, પોસ્ટર્સ વગેરે દ્વારા મેળવે છે. દર ઉનાળાની સિઝનમાં તેમની આ કામગીરી માટે તેમને દાતાઓનો પ્રતિસાદ મળી રહે છે.

ગ્રીષ્મા શાહ છેલ્લાં ત્રણ વર્ષથી તેમના ગ્રૂપ સાથે ટ્રાફિક પોલીસ કર્મચારીઓને હીટ વેવ સ્ટ્રોકથી બચાવવા નિયમિત રીતે એનર્જી ડ્રિન્ક સર્વ કરવાની કામગીરી કરી રહ્યાં છે. મોટા ભાગે ટ્રાફિક મેનેજ કરવાની કામગીરીમાં ટ્રાફિક પોલીસકર્મી તેમના માટે બનાવેલી કેબિનમાં શેલ્ટર લઇ શકતા નથી, જેના કારણે ખુલ્લા તડકામાં કામગીરી કરવી પડે છે.