ગુજરાતમાં યુવાધનને ડ્રગ્સ દ્વારા બરબાદ કરવાનું ષડયંત્ર ચાલી રહ્યું છે. ડ્રગ્સની હેરાફેરી, ડ્રગ્સનું સેવન અને ડ્રગ્સનું વેચાણ ગુજરાતમાં મોટાપાયે થતું હોવાનું ખુલી રહ્યું છે. ત્યારે હવે જામનગરમાં ડ્રગ્સ રેકેટનો પર્દાફાશ થયો છે.
જામનગરમાં ડ્રગ્સ રેકેટનો થયો પર્દાફાશ
કરોડોના ડ્રગ્સ સાથે એક આરોપીની ધરપકડ
નેવી ઇન્ટેલિજન્સે ડ્રગ્સ માફિયાઓના રેકેટનો કર્યો પર્દાફાશ
સુરત બાદ હવે જામનગરમાંથી કરોડોની કિંમતનું ડ્રગ્સ ઝડપાયું છે. જામનગર શહેરના શરૂ સેકશન રોડ પરથી નેવી ઈન્ટેલિજન્સે કરોડોની કિંમતનું MD ડ્રગ્સ ઝડપી પાડ્યું છે. તેમની પૂછપરછમાં વધુ ત્રણ શખ્સોના નામ ખુલ્યા હોવાનું સામે આવ્યું છે.
કરોડોના ડ્રગ્સ સાથે એક આરોપીની ધરપકડ
પ્રાપ્ત વિગતો અનુસાર, નેવી ઈન્ટેલિજન્સે યોગ્ય બાતમીના આધારે શરૂ સેક્શન રોડ પર વોચ ગોઠવી હતી. આ દરમિયાન એક શંકાસ્પદ વ્યક્તિને અટકાવ્યો હતો અને તેની તલાશી લેતા તેની પાસેથી MD ડ્રગ્સનો 10 કિલો જથ્થો મળી આવ્યો હતો. જેની કિંમત 6 કરોડ રૂપિયા ગણાવવામાં આવી રહી છે.
ગુનો નોંધવાની તજવીજ હાથ ધરી
હાલ આ મામલે આરોપી સામે ગુનો નોંધવાની તજવીજ હાથ ધરવામાં આવી છે. આરોપીની પ્રાથમિક પૂછપરછમાં તે આ ડ્રગ્સનો જથ્થો મુંબઈથી લાવ્યો હોવાનું સામે આવ્યું છે. આરોપી આ MD ડ્રગ્સનો જથ્થો કોને આપવાનો હતો. તે દિશામાં તપાસ હાથ ધરવામાં આવી છે.
સુરતમાંથી બુધવારે ઝડપાયો હતો ડ્રગ્સનો જથ્થો
અત્રે ઉલ્લેખનીય છે કે, બુધવારે મોડી રાત્રે સુરતમાંથી ડ્રગ્સનો જથ્થો મળી આવ્યો હતો. આ મામલે પોલીસ કમિશનર અજય તોમરે પત્રકાર પરિષદ યોજી ચોંકાવનારા ખુલાસા કર્યા હતા. તેમણે જણાવ્યું હતું કે, સારોલી પોલીસને બાતમી મળતા ટીમે નિયોલ ચેક પોસ્ટ પાસે વોચ ગોઠવી હતી, આ દરમિયાન એક શંકાસ્પદ યુવકને અટકાવીને તેની બેગ તપાસવામાં આવી હતી. જેમાંથી ડ્રગ્સનો જથ્થો મળી આવ્યો હતો. શરૂઆતમાં આ યુવકે આ સફેદ પાવડરને ફટકડી ગણાવી હતી. જોકે, બાદમાં એફએસએલ રિપોર્ટમાં તે MD ડ્રગ્સ હોવાનું સામે આવ્યું હતું.
મુંબઇથી ડ્રગ્સ લઈ સુરત સપ્લાય કરવા આવ્યો હતો યુવક
તેમણે જણાવ્યું હતું કે, પોલીસે આ યુવક પાસેથી 1 કિલો 670 ગ્રામ ડ્રગ્સનો જથ્થો કબજે કર્યો છે. જેની કિંમત 1 કરોડ 60 લાખ 70 હજાર થાય છે. સુરતમાં એમડીના આટલા મોટા જથ્થાનો પ્રથમ કેસ છે. ઝડપાયેલા પકડાયેલા ડ્રગ્સ માફીયાનું નામ અફઝલ ઉર્ફે ગુરૂ સુબ્રરતઅલી સૈયદ મૂળ રાજસ્થાનનો રહેવાસી છે અને હાલ અફઝલ ઉર્ફે ગુરુનો પરિવાર મુંબઈ ખાતે રહે છે. ડ્રગ્સ માફીયા લકઝરી બસમાં મુંબઇથી એમડી લઈ સુરત સપ્લાય કરવા આવ્યો હતો.