- રેલવેની લગેજ પોલિસીના નિયમોમાં ફેરફાર અંગે સ્પષ્ટતા
- રેલવેએ પોતાના ટ્વીટર હેન્ડલ પર જણાવી માહિતી
- જૂની પોલિસી જ હજુ યથાવત કોઈ બદલાવ નથી થયો
લગેજ પોલિસીમાં ફેરફાર
જો તમે રેલમાં મુસાફરી કરતા હોય તો આ વાત જાણવી જરૂરી છે યાત્રીઓ માટે હવે મહત્વના સમાચાર આવ્યા છે. રેલવેએ એક મોટા સમાચારનું ખંડન કર્યું છે. ભારતીય રેલવેએ રેલવેની લગેજ પોલિસીના નિયમોમાં ફેરફાર અંગેના અહેવાલોને અફવા ગણાવીને રદિયો આપ્યો છે.
રેલવે ઇનકાર કર્યો
રેલવેએ મુસાફરોને આવી અફવાઓ પર વિશ્વાસ ન કરવાની સલાહ આપતા કહ્યું છે કે રેલવેની લગેજ પોલિસી 10 વર્ષ જૂની છે અને તે મુજબ રેલવે મુસાફરો પોતાની સાથે સામાન લઇ જઇ શકે છે. રેલવેએ સ્પષ્ટ કહ્યું છે કે ટ્રેનમાં બુકિંગ કરાવ્યા વગર સામાન લઈ જવા માટે મુસાફરે કોઈ વધારાના પૈસા ચૂકવવા પડશે નહીં. નોંધનીય છે કે, થોડા દિવસો પહેલા સોશિયલ મીડિયા પ્લેટફોર્મ અને ડિજિટલ ન્યૂઝ ચેનલો પર એક સમાચાર બતાવવામાં આવી રહ્યા હતા કે રેલવેએ પોતાની લગેજ પોલિસીમાં ફેરફાર કર્યો છે અને હવે નિર્ધારિત મર્યાદાથી વધુ લગેજ લઇ જનારા મુસાફરો પાસેથી દંડ વસૂલવામાં આવશે. પરંતુ હવે આ સમાચાર પર રેલવે પોતાની સ્પષ્ટતા જાહેર કરી છે.
રેલવેએ ખરાઈ કરી
રેલવેએ સોશિયલ મીડિયા પ્લેટફોર્મ 'ટ્વીટર' પર એક પોસ્ટ શેર કરી છે, જેમાં ખુલાસો કરવામાં આવ્યો છે કે આ સમાચારોની સચ્ચાઈ શું છે ? રેલવેએ પોતાની પોસ્ટમાં લખ્યું છે કે, "છેલ્લા કેટલાક દિવસોમાં સોશિયલ મીડિયા પ્લેટફોર્મ અને ડિજિટલ ન્યૂઝ ચેનલો પર એક સમાચાર પ્રકાશિત કરવામાં આવ્યા છે કે , મુસાફરી દરમિયાન લઇ જઇ શકાય તેવી ચીજવસ્તુઓની નીતિમાં રેલવે દ્વારા ફેરફાર કરવામાં આવ્યો છે. આ અંગે સ્પષ્ટતા કરવામાં આવે છે કે, ભારતીય રેલવે દ્વારા આ અંગે કોઇ સર્ક્યુલર કે આદેશ જારી કરવામાં આવ્યો નથી. વર્તમાન નીતિ ખૂબ જ જૂની છે અને 10 વર્ષથી વધુ સમયથી અમલમાં છે. "
મુસાફર કેટલો સામાન લઈ જઈ શકે છે?
ભારતીય રેલવેના નિયમ મુજબ અલગ અલગ કેટેગરીમાં રેલ યાત્રીઓ મુસાફરી દરમિયાન પોતાની સાથે ટ્રેનના ડબ્બામાં 40 કિલોથી લઈને 70 કિલો સુધીનો ભારે સામાન લઈ જઈ શકે છે. જો આના કરતા વધારે સામાન હોય તો મુસાફરે વધારાનો ચાર્જ ચૂકવવો પડે છે. નિયમ એક હેઠળ સ્લીપર ક્લાસમાં 40 કિલો, ટુ ટાયરમાં 50 કિલો સુધી છૂટ આપવામાં આવી છે, જ્યારે ફર્સ્ટ ક્લાસ એસીમાં મહત્તમ 70 કિલો સુધીની છૂટ છે.
