પ્રતિક્રિયા / હાઈકોર્ટના ચુકાદા બાદ કોંગ્રેસની માંગ, ભુપેન્દ્રસિંહ ચુડાસમા નૈતિકતાની દ્રષ્ટિએ રાજીનામું આપે

• શક્તિસિંહ ગોહિલે કહ્યું હાઈકોર્ટના ચુકાદાએ સાબિત કર્યું સત્યમેવ જયતે 
• ગુજરાત કોંગ્રેસ પ્રભારી રાજીવ સાતવે કહ્યું ગુજરાતનું ચૂંટણી મોડેલ ખુલ્લું પડ્યું 
• અમિત ચાવડાએ કહ્યું ભુપેન્દ્રસિંહે નૈતિકતાની દ્રષ્ટીએ રાજીનામું આપવું જોઈએ

 
હાઈકોર્ટનો ચુકાદો આવતાં જ કોંગ્રેસના નેતાઓમાં આનંદની લાગણી છવાઈ ગઈ હતી. કોંગ્રેસના દિગ્ગજ નેતા શક્તિસિંહ ગોહિલે ટ્વિટ કરી કહ્યું કે સત્યમેવ જયતે. આ સાથે ગુજરાત કોંગ્રેસના પ્રભારી રાજીવ સાતવે હાઈકોર્ટના ચુકાદાને આવકાર્યો હતો અને કહ્યું કે ગુજરાતની ચૂંટણીનું મોડેલ આ ચુકાદાથી ખુલ્લું પડ્યું. ગુજરાતના કાયદા પ્રધાન ભુપેન્દ્રસિંહની જીત મુદ્દેનો આ ઐતિહાસિક ચુકાદો રહેશે.

ભાજપ સરકાર સત્તાનો દુરપયોગ કરે છે તે સ્પષ્ટ થયુંઃ ચાવડા

ભુપેન્દ્રસિંહના ચુકાદા અંગે કોંગ્રેસના ગુજરાત પ્રદેશ અધ્યક્ષ અમિત ચાવડાએ પ્રેસ કોન્ફરન્સ કરી જણાવ્યું કે, ચુકાદાથી એ ખુલ્લું પડ્યું કે ભાજપ સરકારે સત્તાનો દુરપયોગ કર્યો હતો. નામદાર કોર્ટના ચુકાદો આવ્યો છે તે સ્પષ્ટ કરે છે કે આ સરકારમાં અધિકારીઓનો ખોટો ઉપયોગ થાય છે. કોંગ્રેસના 2107ના ઉમેદવાર અશ્વિન રાઠોડ પર પણ ભાજપ દ્વારા ખુબ જ દબાણ અને લોભ-લાલચ આપવામાં આવી હતી. 

સરકાર ચુકાદાની તાત્કાલિક અમલવારી કરાવેઃ ચાવડા

અમિત ચાવડાએ રાજ્ય સરકારને આ ચુકાદા અંગે  કહ્યું કે , રાજ્ય સરકાર હાઈકોર્ટના આ ચુકાદાની તાત્કાલિક અમલવારી કરાવે. રાજ્ય સરકાર ચુકાદાનું પાલન નહીં કરે તો કોંગ્રેસ સુપ્રીમ કોર્ટમાં જશે. આ ઉપરાંત ભુપેન્દ્રસિંહ ચુડાસમાએ નૈતિકતાના ધોરણે રાજીનામું આપવું જોઈએ. ખોટી રીતે ચૂંટાયા હોવાનું હાઇકોર્ટ કહેતી હોય ત્યારે તેમને પદ પર રહેવાનો અધિકાર નથી. મુખ્યમંત્રીએ પણ આ બાબતે વિચાર કરી યોગ્ય નિર્ણય લેવો જોઈએ.