ભાવ વધારો / મોંઘવારીનો વધુ એક ડામ, અદાણી બાદ ગુજરાત ગેસે પણ ભાવ વધાર્યા, જાણો CNG અને PNG માં કેટલો થયો વધારો

• વાહનચાલકો પર મોંધવારીનો વધુ એક માર
• અદાણી બાદ ગુજરાત ગેસે પણ CNGમાં ભાવ વધારો ઝીંક્યો
• ગુજરાત ગેસનો નવો ભાવ 82.16 રૂપિયા પ્રતિ કિલો

અદાણી બાદ ગુજરાત ગેસે પણ CNGમાં ભાવ વધારો ઝીંક્યો

પ્રજાને મોંઘવારીનો વધુ એક ડામ લાગ્યો છે. અદાણી બાદ ગુજરાત ગેસે પણ CNG ગેસના ભાવમાં 2 રૂપિયા 60 પૈસાનો વધારો કર્યો છે. જ્યારે PNGમાં ભાવમાં 3 રૂપિયા 91 પૈસા વધાર્યા છે. આમ ગુજરાત સરકારની ગેસ કંપની ગુજરાત ગેસ લિમિટેડે CNG ગેસના ભાવમાં રૂ. 2.60 ભાવ વધારો જાહેર કરતાં રાજ્યમાં ગેસનો ભાવ રૂ. 82.16ના સ્તરે પહોંચી ગયા છે. જ્યારે PNG ગેસના ભાવ રૂપિયા 48.50 થયા છે.  

CNGમાં અદાણી અને ગુજરાત ગેસના ભાવ એક સમાન થયા

ઉલ્લેખનીય છે કે, ગત માસના પ્રથમ સપ્તાહમાં અદાણી જૂથ દ્વારા CNGની કિંમતમાં તોતિંગ વધારો કરી દેવામાં આવ્યો છે. અદાણી ગેસ તરફથી CNGની કિંમતમાં એક સાથે પાંચ રૂપિયાનો વધારો થયો છે. આ સાથે જ અમદાવાદમાં CNGનો નવો ભાવ 79.59 રૂપિયા થયો છે. મહત્વનું છે કે, અમદાવાદમાં CNGનો જૂનો ભાવ 74.59 રૂપિયા હતો. આમ ગુજરાત ગેસના જુના ભાવ 79.56 હતા જે વધીને 82.16 રૂપિયા પ્રતિ કિલો થયા જ્યારે PNGમાં જુના ભાવ 44.14 હતા જે વધી 48.50 રૂપિયા થયા છે.