હાઈ એલર્ટ / અફઘાની આતંકી ભારતમાં ઘૂસ્યા, ગુજરાત ATSએ તમામ પોલીસને સ્કેચ ફેક્સ કર્યા

ગુજરાત ATSએ તમામ પોલીસને સ્કેચ ફેક્સ કર્યા છે. ગુજરાત એટીએસના એલર્ટ બાદ રાજ્યની પોલીસ પણ એલર્ટ થઈ ગઇ છે. ઉલ્લેખનીય છે કે હાલમાં ગુજરાતની તમામ બોર્ડર પર પોલીસનું સઘન ચેકિંગ કરવામાં આવી રહ્યુ છે. 

IBના ઇનુપટ બાદ વલસાડ જિલ્લામાં પણ પોલીસ એલર્ટ

IBના ઇનપુટ બાદ વલસાડ જિલ્લામાં પણ પોલીસ એક્શનમાં આવી ગઇ છે. વલસાડ જિલ્લાની તમામ ચેકપોસ્ટ પર સઘન વાહન ચેકિંગ હાથ ધરવામાં આવ્યું છે. ગુજરાત-મહારાષ્ટ્ર બોર્ડર પર હથિયારધારી પોલીસ જવાનો તહેનાત કરી દેવાયા છે. જ્યારે બોર્ડર પરથી નીકળતાં તમામ વાહનોની તપાસ કરવામાં આવી રહી છે.

મધ્યપ્રદેશ-ગુજરાતને જોડતી દાહોદની બોર્ડર સીલ કરાઇ

ભરૂચમાં આતંકી ઘૂસ્યા હોવાના ઇનપુટને લઇને સઘન ચેકિંગ હાથ ધરવામાં આવ્યું છે. દાહોદની ખંગેલા બોર્ડરને સીલ કરી દેવાઇ છે. મધ્યપ્રદેશ-ગુજરાતને જોડતી સરહદ સીલ કરાઇ છે. ખંગેલા બોર્ડર પર SRPની ટીમ અને પોલીસ જવાનો તૈનાત કરી દેવાયા છે. જવાનો બુલેટપ્રુફ જેકેટ અને હથિયાર સાથે ગુજરાતમાં પ્રવેશ કરતા વાહનોનું સઘન ચેકિંગ કરી રહ્યાં છે.

ઉલ્લેખનીય છે કે દેશમાં આતંકી હુમલાની આશંકાને લઈને ગુજરાત રાજસ્થાનની બોર્ડર પર એલર્ટ આપવામાં આવ્યું છે. આતંકી હુમલાની આશંકાને લઈને ખોડા, રતનપુર અને અમીરગઢ બોર્ડર પર તપાસ કરવામાં આવી રહી છે.  આતંકી હુમલાના ભયને લઇને શામળાજી અને અમીરગઢમાં તૈનાત પોલીસને બુલેટપ્રુફ જેકેટ પણ આપવામાં આવ્યાં છે.

આ આદેશ આતંકી હુમલાના એલર્ટને લઈને DGP દ્વારા આપવામાં આવ્યા છે. DGPના આદેશ બાદ સઘન ચેકિંગ કરવામાં આવી રહ્યું છે. હાલમાં શામળાજી પોલીસ સાથે SRP અને GRDના જવાનોને પણ બોર્ડર પર તૈનાત કરાયા છે. બોર્ડર પર પોલીસના જવાનો વાહનોની સઘન તપાસ કરી રહ્યા છે.