સૈનિક વાપસી / અમેરિકી સૈનિકોએ હજુ અફઘાનિસ્તાન છોડ્યું જ હતું ને ઍરબેઝ પર બની ચોંકાવનારી ઘટના

• અફઘાનિસ્તાનના બગરામ એરપોર્ટ પરની ઘટના
• બગરામ એરપોર્ટ પરથી અમેરિકી સૈનિકોની છેલ્લી ટૂકડી રવાના થઈ
• એરપોર્ટ ખાલી જોઈને લોકો ઘુસી આવ્યાં, લૂંટફાટ કરવા લાગ્યાં
• અંતે અફઘાની સુરક્ષા અધિકારીઓએ એરપોર્ટનો કબજો સંભાળી લીધો 

અમેરિકા અને નાટો દેશોએ અફઘાનિસ્તાનમાંથી સૈનિકો ખસેડવાનું શરુ કરી દીધું છે. શનિવારે અમેરિકી સેનાની એક છેલ્લી ટૂકડી પણ રવાના થઈ હતી. પરંતુ જેવા અમેરિકી સૈનિકો રવાના થયા કે તરત જ જાણે રાહ જોઈને બેસી રહ્યાં હોય તેમ સ્થાનિક લોકો ઘુસી આવ્યાં અને એરપોર્ટની મોટી મોટી અનેક બિલ્ડિંગોમાંથી જે કંઈ હાથમાં લાગ્યું કે લઈને રવાના થવા લાગ્યાં. લોકો પ્લાસ્ટિક અને મેટલની ચીજો પણ લઈ ગયા હતા અને ઘણા કલાકો સુધી લોકોએ લૂંટ ચલાવી હતી. જોકે અંતે અફઘાન નેશનલ સિક્યુરીટી અને ડિફેન્સ ફોર્સિસે લૂંટફાટ કરનાર લોકોને ખદેડી મૂક્યા હતા અને એરપોર્ટનો કબજો સંભાળી લીધો હતો.

અફઘાની સુરક્ષા અધિકારીઓનું કહેવું છે કે અમેરિકી સૈનિકો જાણ કર્યા વગર બારોબાર એરપોર્ટ છોડીને રવાના થઈ ગયા તેને પરિણામે લોકોને એરપોર્ટમાં ઘુસવાની તથા લૂંટ ચલાવવાની તક મળી. તેમણે કહ્યું કે જો અમેરિકી સૈનિકોએ જાણ કરી હોત તો અમે હંગામી વ્યવસ્થા કરી દીધી હોત અને આવી લૂંટફાટ ન મચી હોત. 

ઉલ્લેખનીય છે કે કાબુલની ઉત્તરે 30 માઈલ દુર આવેલો બગરામ એરબેઝ પર અમેરિકાએ થાણુ સ્થાપી રાખ્યું છે. અમેરિકી પ્રમુખ જો બાઈડને 11 સપ્ટેમ્બર 2021 સુધી અફઘાનિસ્તાનમાંથી તેમના દેશના સૈનિકોને સંપૂર્ણપણે હટાવી લેવાની જાહેરાત કરી છે. જે હેઠળ છેલ્લી એક ટૂકડી શનિવારે બગરામમાંથી સ્વદેશ રવાના થઈ હતી.