ઓવર સ્પીડમાં વાહન ચલાવતા અમદાવાદીઓની હવે ખેર નથી. કારણ કે આજથી પોલીસ કમિશનરના જાહેરનામાનો અમલ શરૂ થઈ ગયો છે. શહેરમાં ટૂવ્હીલર, કાર, રિક્ષા અને ભારે વાહનોની સ્પીડ નક્કી કરી દેવામાં આવી છે. જો હવે તમે શહેરમાં સ્પીડમાં વાહન ચલાવ્યું તો જેલમાં જવાનો પણ વારો આવી શકે છે.
શહેરમાં વધી રહેલા ટ્રાફિક અને અકસ્માતોની સંખ્યા ઘટાડવા માટે હવે સ્પીડ લિમીટ લાગુ કરી દેવામાં આવી છે. જેમાં શહેરના આંતરિક માર્ગો પર ટૂવ્હીલરની સ્પીડ 50 કિમી, થ્રી વ્હીલરની સ્પીડ 40 જ્યારે કાર માટે 60 અને ટ્રક જેવા ભારે વાહનોની સ્પીડ 40 નક્કી કરાઈ છે. જ્યારે નેશનલ હાઈ-વે એટલે કે એસ.જી. હાઈવે અને નારોલથી નરોડા હાઈ-વે પર ટુવ્હીલરની સ્પીડ 80, થ્રી વ્હીલરની 50, કારની 100, મીની લકઝરી બસની 90 જ્યારે ટ્રક-ટ્રેલર જેવા ભારે વાહનની સ્પીડ 80 નક્કી કરાઈ છે.
વાહનની સ્પીડ નક્કી કરનારું અમદાવાદ રાજ્યનું પ્રથમ શહેર છે. જોકે શહેરમાં 44 લાખ વાહનો સામે પોલીસ પાસે માત્ર 5 જ સ્પીડ ગન છે. ઓવર સ્પીડ બદલ અત્યાર સુધી 1 હજારનો દંડ વસૂલાતો હતો, પરંતુ હવે તેમની સામે જુદી જુદી કલમો હેઠળ ગુનો નોંધવામાં આવશે. જેમાં મહત્તમ 2 વર્ષની સજા થઈ શકે છે. શરૂઆતમાં શહેરના 5 વિસ્તારમાં ડ્રાઈવ થશે.. જેમાં ઓગણજ સર્કલ, વિશાલા હોટેલ, નિરમા યુનિવર્સિટી, ઓઢવ રિંગ રોડ અને કોતરપુર પાસે ડ્રાઈવ યોજાશે.
મહત્વનું છે કે, કેન્દ્ર સરકાર દ્વારા રજૂ કરવામાં આવેલ બિલ અનુસાર રેસિંગ કરતા ઝડપાશે તો પાંચ હજાર ચુકવવા પડશે. જ્યારે ઓવર સ્પીડ માટે નવા કાયદા પ્રમાણે બેથી ચાર હજાર દંડની જોગવાઇ છે. સમગ્ર દેશમાં અકસ્માત અટકાવવા માટે સરકાર દ્વારા મોટર વ્હિકલ બિલ 2019 રાજ્યસભામાં પાસ કર્યું હતું. જેમાં ગાડી ચલાવતી વખતે મોબાઇલનો ઉપયોગ કરવો, નશામાં વાહન ચલાવવું, રેડ લાઇન પાર કરવી, વાહન ઓવર ટેક કરવું, ખુબ ઝડપી વાહન ચલાવવું જેવા મુદ્દે નિયમો ઘડાયા છે.