એક્શન પ્લાન / છાનામાનાં ધાબે ચઢી ચાઇનીઝ દોરીથી પતંગ ચગાવવાનો પ્લાન છે? ચેતી જજો નહીંતર પસ્તાવાનો પાર નહીં રહે

• ચાઇનીઝ દોરીના વેચાણ અને ઉપયોગ પર પ્રતિબંધ
• ઉત્તરાયણને લઈને વડોદરા પોલીસે તૈયાર કર્યો એક્શન પ્લાન
• પોલીસની ટીમ વિવિધ વિસ્તારો પર રાખશે નજરઃ શમશેર સિંહ
• ચાઇનીઝ દોરીનો ઉપયોગ કરનારાઓ સામે કરાશે કાર્યવાહી

ઉત્તરાયણના તહેવારને આડે હવે બે દિવસ જ બાકી છે. ત્યારે વડોદરા પોલીસ એક્શનમાં આવી છે. વડોદરા પોલીસ કમિશનર શમશેર સિંહે જણાવ્યું છે કે, ચાઇનીઝ દોરીના વેચાણ અને ઉપયોગ પર પ્રતિબંધ છે. રાજ્યભરમાં ચાઇનીઝ દોરી વેચનારાઓ સામે કાર્યવાહી કરવામાં આવી રહી છે. ત્યારે ઉત્તરાયણને લઈને પણ પોલીસે ખાસ પ્લાન બનાવ્યો છે. 

ઘાતક માંજાનો ઉપયોગ કરનારાઓ પર બાજ નજર રાખશે પોલીસ
પોલીસ કમિશનરે જણાવ્યું કે, 'ઉત્તરાયણના દિવસે શહેરભરમાં પોલીસની ટીમો ફરતી રહેશે અને ઘાતક માંજાનો ઉપયોગ કરનારાઓ પર બાજ નજર રાખશે. જો પોલીસની ટીમને ચાઇનીઝ દોરી અંગે માહિતી મળશે તો ટીમ ચોક્કસ ઘર, એપાર્ટમેન્ટ અને ટેરેસની તપાસ કરશે. આ દરમિયાન જો કોઈ વ્યક્તિ ચાઇનીઝ દોરીનો ઉપયોગ કરીને પતંગ ઉડાવતો જોવા મળશે તો તરત જ કાર્યવાહી કરવામાં આવશે.' તેમણે જણાવ્યું કે, આવા માંજાનો ઉપયોગ પક્ષીઓ અને માણસો બંને માટે જોખમી છે.

કોઈ ચાઈનીઝ દોરીને ઉપયોગ કરે તો પોલીસ કંટ્રોલ રૂમમાં ફોન કરી જાણ કરોઃ કમિશનર
શમશેરસિંહે જણાવ્યું કે, 'ચાઇનીઝ દોરીનું વેચાણ કરનારા અને સ્ટોક કરનારા કેટલાક લોકોની ધરપકડ કરવામાં આવી રહી છે, પરંતુ તેમ છતાં તેનું ગેરકાયદેસર વેચાણ થઈ રહ્યું છે. અમે જીવલેણ દોરી ખરીદનારાઓ સામે કાર્યવાહી કરીને માંગને ઘટાડવા માંગીએ છીએ. જો કોઈને ઉત્તરાયણ દરમિયાન ચાઇનીઝ દોરીનો ઉપયોગ થતો જોવા મળે તો તેઓ પોલીસ કંટ્રોલ રૂમને કોલ કરી શકે છે. અમે તરત જ તેમની સામે કાર્યવાહી કરીશું.'

ઝડપી પાડ્યો હતો ચાઇનીઝ દોરી અને તુક્કલનો જંગી જથ્થો 
તંત્રએ ચાઇનીઝ દોરી પર પ્રતિબંધ મુક્યો હોવા છતાં પણ રાજ્યભરમાં ચાઇનીઝ દોરીનું વેચાણ યથાવત છે. તેને રોકવા માટે પોલીસ દ્વારા સર્ચ ઓપરેશન કરવામાં આવી રહ્યાં છે. તેવામાં જ બે દિવસ અગાઉ પોલીસને સર્ચ ઓપરેશન દરમિયાન વડોદરામાં ચાઇનીઝ દોરી અને તુક્કલનો જંગી જથ્થો ઝડપી પાડ્યો હતો. 

4 લાખનો મુદ્દામાલ જપ્ત
મકરસંક્રાંતિના પર્વને લઇને કેટલાક પતંગ રસીયાઓ ચાઇનઝ દોરી અને તુક્કલનો ઉપયોગ કરતા હોય છે. ત્યારે મકર સંક્રાતિ પહેલા વડોદરા શહેર PBCએ બાતમીના આધારે ચાઇનીઝ તુક્કલનો જંગી જથ્થો ઝડપી પાડ્યો હતતો. પીબીસીએ 2.25 લાખના ચાઇનીઝ તુક્કલ, ચાઇનીઝ દોરી સહિત 4 લાખનો મુદ્દામાલ જપ્ત કરી ત્રણ શખ્સોની ધરપકડ કરી હતી.