નિર્ણય / બનાસકાંઠામાં 'નશાના બંધાણી' શિક્ષકો સામે શિક્ષણાધિકારીએ લીધા એક્શન, દારૂ ઢીંચીને આવ્યા હતા સ્કૂલે, જાણો મામલો

• બનાસકાંઠામાં પ્રાથમિક શાળાના વાયરલ વીડિયોનો મામલો
• નશામાં આવેલા શિક્ષક જોવરા બુંબડીયા અને નંદ તરાલ સસ્પેન્ડ
• TPOની તપાસ બાદ લેવાયો નિર્ણય

બનાસકાંઠામા ચીકાર દારૂનો નશો કરી શિક્ષક  વિદ્યાર્થીઓને ભણાવતો હતો જે વીડિયો બનાસકાંઠાના દાંતા તાલુકાના જોધસર ગામની પ્રાથમિક શાળાનો હોવાનું સામે આવ્યું હતું.આથી વાલીઓમાં ભારે રોષ જોવા મળ્યો હતો અને વાયરલ વીડિયો મામલે શિક્ષકને સસ્પેન્ડ કરવાની વાલીઓમાં માંગ ઉઠી હતી.જેને પગલે તંત્ર દ્વારા તાત્કાલિક નશામાં આવેલ શિક્ષક જોવરા બુંબડીયા અને નંદભાઇ તરાલને સસ્પેન્ડ કરી કાયદાના પાઠ ભણાવવામાં આવ્યા છે.

શુ હતી સમગ્ર ઘટના?

બનાસકાંઠામા નશાની હાલતમા વિદ્યાર્થીઓને ભણાવતા શિક્ષકનો વીડિયો સોશિયલ મીડિયા પર વાયરલ થયો હતો. વીડિયોમાં પીધેલી હાલતમાં એક શિક્ષક વિદ્યાર્થીઓને અભ્યાસ કરાવી રહ્યો હતો. જે વાયરલ વીડિયોમાં દ્રશ્યમાન થતી માહિતી મુજબ વીડિયો ઉતારનાર વ્યક્તિ શિક્ષકને પૂછે છે કે ભણાવવાનું કે ખાલી દારુ જ પીવાનો છે.જેમાં પણ શિક્ષક લાજવાને બદલે ગાજતો હોય તેમ જવાબમાં દારુ પીવાનો તેમ શિક્ષકે કહ્યું હતું. 

TPOની તપાસ બાદ લેવાયો નિર્ણય

નશામાં ધૂત થઈને આ શિક્ષક શાળામાં બાળકોને ભણાવતો હોવાથી આવા શિક્ષકોને કારણે અંતરિયાળ આદિવાસી વિસ્તારમાં શિક્ષણની સ્થિતિ કથળી હોવાનું લોકો જણાવી રહ્યા હતા. વધુમાં આ જ શાળામાં અન્ય શિક્ષક પણ દારૂ પીને ભણાવતા હતા. ત્યારબાદ TPO ને આ મામલે વધુ તપાસ સોંપવામાં આવી હતી. જે તપાસ પૂર્ણ થયા બાદ કડક નિર્ણય લેવાયો છે. જેમાં પ્રાથમિક શિક્ષણઅધિકારી દ્વારા બને બંધાણી શિક્ષકને સસ્પેન્ડ કરવાની કાર્યવાહી કરવામાં આવી છે.