ઉત્તર પ્રદેશમાં ATM કાર્ડથી પેટ્રોલ ભરાવનારના ખાતામાંથી રુપિયાની ઉઠાંતરી કરનાર 3 શખ્સો ઝડપાયા,3 ફરાર
ATMકાર્ડથી પેટ્રોલ પુરાવનાર સાવધાન
પેટ્રોલપંપ પર સેલ્સમેનના રુપમાં હેકર્સ
યુપીમાં 3 આરોપી ઝડપાયા, 1 પેટ્રોલપંપનો કર્મી
જો તમે એટીએમ કાર્ડથી પેટ્રોલ ભરાવતા હોવ તો સાવધાન થઇ જજો, હેકર્સ તમારા બેંક એકાઉન્ટને હેક કરી શકે છે. યુપી પોલીસે સોમવારે એક ટોળકીનો પર્દાફાશ કર્યો હતો જે પેટ્રોલ પંપ પર કાર્ડથી પેટ્રોલ નંખાવનાર લોકોના એટીએમ કાર્ડને હેક કરીને ક્લોન બનાવીને તેઓના ખાતામાંથી પૈસા ઉપાડતા હતા.
પોલીસે 3 આરોપી ઝડપાયા
પોલીસે આ કેસમાં ત્રણ લોકોની ધરપકડ કરી છે જ્યારે અન્ય ફરાર 3 લોકોને શોધવા માટે તપાસના ચક્રોગતિમાન કર્યા છે. ઝડપાયેલા આરોપીઓમાં એક પેટ્રોલ પંપ પર કામ કરતો કર્મચારી છે. બીટા-2 સ્ટેશનના પ્રભારી અનિલ કુમાર સિંહે જણાવ્યું કે એક માહિતીના આધારે પોલીસે સોમવારે આરોપી તરુણ, વિકાસ અને પંકજની ધરપકડ કરી હતી. તેણે જણાવ્યું કે તરુણ અચર ગામમાં સ્થિત પેટ્રોલ પંપ પર કામ કરતો હતો.
આવી રીતે ATM પિન મેળવી લેતા
આરોપીઓની પૂછપરછ દરમિયાન સામે આવ્યુ કે પેટ્રોલપંપ પર પેટ્રોલ ભરાવવા આવનારે જ્યારે એટીએમ કાર્ડ સેલ્સમેનને આપ્યુ ત્યારે આરોપીઓએ તેમની પાસે રહેલા સ્કેનર મશીનથી એટીએમ કાર્ડ સ્કેન કર્યુ. સાથે સાથે એટીએમ દ્વારા ક્લોન પણ કર્યુ. એટલુ જ નહી જ્યારે ગ્રાહક એટીએમ પીન એન્ટર કરે ત્યારે તે વોચ રાખતો અને એટીએમ પિન નંબર જાણી લેતો હતો.
પેટ્રોલપંપનો કર્મી નીકળ્યો આરોપી
પોલીસ સ્ટેશનના પ્રભારીએ જણાવ્યું કે એટીએમ કાર્ડનું કલોનિંગ કર્યા બાદ આરોપીઓ મુંબઇ, મહારાષ્ટ્ર અને કલકત્તામાં રહેતા મિત્રોના માધ્યમથી પીડિત ગ્રાહકોના ખાતામાંથી પૈસા ઉપાડતા હતા. તેમણે કહ્યું કે ગેંગના ત્રણ સભ્યો હજુ પણ ફરાર છે. તેમણે કહ્યું કે પૂછપરછ દરમિયાન પોલીસને જાણવા મળ્યું છે કે નોઈડા અને ગ્રેટર નોઈડાના ઘણા વિસ્તારના પેટ્રોલ પંપ પર સેલ્સમેન તરીકે આવા ઠગ લોકો કામ કરે છે. જે સામાન્ય લોકોના એટીએમ કાર્ડ ક્લોન કરીને તેમના ખાતામાંથી પૈસા ઉપાડી લે છે. વધુમાં પોલીસે જણાવ્યું કે ફરાર આરોપીઓની જલ્દીથી જ ધરપકડ કરવામાં આવશે, પોલીસે આરોપીઓ પાસેથી સ્કેનર મશીન, મોબાઇલ ફોન કબ્જે કર્યો છે. આ ઉપરાંત આરોપીઓએ એક હજાર કરતા પણ વધારે લોકોનો એટીએમ ડેટા હેક કરીને પૈસા ઉપાડ્યા હોવાની કબૂલાત કરી હતી.