કોની બેદરકારી? / બાપ રે! કોર્ટની અંદર જ મહિલા જજ પર આરોપીનો એટેક, ફેંકી એવી ચીજ કે તમે પણ ચોંકી જશો

• નવસારીમાં મહિલા જજ પર આરોપીએ કર્યો હુમલો 
• 326ના ગુના આરોપીને કોર્ટેમાં કરાયો હતો રજૂ 
• મહિલા જજ પર હુમલાની ઘટનાને બાર એસોસિએશને વખોડી
• અગાઉ પણ આરોપીએ અન્ય જજ પર ફેંક્યું હતું ચપ્પલ  

નવસારીમાં એક આરોપીએ કોર્ટમાં જ મહિલા જજ પર હુમલો કર્યો હતો. એટલું જ નહીં આરોપીએ જજને અપશબ્દો પણ બોલ્યા હતા. આ અંગે મળતી મહિતી અનુસાર, 326ના ગુનામાં સામેલ આરોપી ધર્મેશ રાઠોડને આજે નવસારી ચીફ કોર્ટમાં રજૂ કરાયો હતો. સુનાવણી દરમિયાન આરોપીએ મહિલા જજ એ.આર.દેસાઈ પર પથ્થર ફેંકીને હુમલો કર્યો હતો.  

ઘટનાને બાર એસોસિએશને વખોડી કાઢી
જેલમાંથી આરોપી પોતાના ખિસ્સામાં પથ્થર લઈને આવ્યો હતો અને મહિલા જજ એ.આર. દેસાઈ પર પથ્થર ફેંકીને હુમલો કર્યો હતો. આ ઘટનાને પગલે જેલ કેદી જાપ્તાની ટુકડી પણ સવાલોના ઘેરામાં આવી છે. તો બીજી બાજુ આ હુમલાની ઘટનાને બાર એસોસિએશને વખોડી કાઢી છે. નોંધનીય છે કે, અગાઉ પણ આરોપીએ અન્ય જજ પર ચપ્પલ ફેંક્યું હતું.

આ બનાવથી તંત્રની લાપરવાહી થાય છે છતીઃ પ્રતાપસિંહ 
આ અંગે માહિતી આપતા એડવોકેટ પ્રતાપસિંહ માહિડાએ જણાવ્યું કે, આજે નવસારીના એડિશનલ ડિસ્ટ્રીક્ટ જજ સાહેબ પર એક આરોપીએ પથ્થર વડે હુમલો કર્યો હતો. નસીબજોગ નામદાર જજ સાહેબને કોઈ ઈજા થઈ નથી. પરંતુ આ બનાવથી તંત્રની લાપરવાહી છતી થાય છે. આ અગાઉ પણ આ આરોપીએ પેરોલ દરમિયાન પણ ગુનો કરેલો હતો, તે કેસ હાલ ચાલે છે. આ સજા પામેલો આરોપી છે. આ આરોપીએ નીચલી અદાલતમાં પણ જજ સાહેબ પર ચપ્પલ વડે હુમલો કર્યો હતો.  જ્યારે આવા આરોપીનો પૂર્વ ઈતિહાસ તંત્ર જાણતું હોય, ત્યારે આવા આરોપીને નામદાર કોર્ટ સમક્ષ રજૂ કરતા પૂરતી સાવધાની લેવી જોઈએ તે તંત્રએ લીધી નથી.