- અમદાવાદ-મુંબઈ નેશનલ હાઈવે પર અકસ્માત
- કરણી સેનાના દમણના અધ્યક્ષ કનકસિંહ જાડેજાનું અકસ્માતમાં મૃત્યુ
- હાઈવે પર ખાડાના કારણે અકસ્માત થયાના આક્ષેપ
અમદાવાદ-મુંબઈ નેશનલ હાઈ-વે પર અકસ્માની ગોઝારી ઘટના સામે આવી હતી. વલસાડથી પસાર થતા હાઈ-વે પર બે કાર વચ્ચે ધડાકાભેર અકસ્માત થયો હતો જેમાં કરણી સેનાના દમણના અધ્યક્ષનું કમકમાટીભર્યું મોત નીપજ્યું હતું. આ મામલે હાઈ-વે ઉપર ખાડાના કારણે કારને અકસ્માત નડ્યો હોવાના કરણીસેનાના કાર્યકરોએ આરોપ લગાવ્યા હતા અને હાઇવે પર આવેલા ટોલ નાકા નજીક મોટી સંખ્યામાં કરણીસેનાના કાર્યકરોએ ઉપસ્થિત થઇ હોબાળો મચાવ્યો હતો. જે અંગે પોલીસને જાણ થતાં પોલીસ કાફલો દોડી ગયો હતો અને પોલીસ અધિકારીઓની સમજાવટથી મામલો થાળે પાડ્યો હતો.
કરણી સેનાના ૫ હોદેદારો વલસાડ ખાતે જઇ રહ્યા હતા
અમદાવાદ-મુંબઈ નેશનલ હાઈ-વે પર વલસાડના વાપી પાસે આવેલા બલિઠા બ્રિજ પાસે અકસ્માતની ઘટના સામે આવી હતી. દમણના અધ્યક્ષ કનકસિંહ જાડેજા અને વલસાડના અધ્યક્ષ સહિત કરણી સેનાના ૫ હોદેદારો વલસાડમાં ખાનગી હોસ્પિટલ ખાતે સારવાર લેતા વ્યક્તિની મદદ માટે વલસાડ જઈ રહ્યા હતા. આ દરમિયાન તેમની રજી નં. ૮૬૩૭ ને વલસાડ નજીક અકસ્માત નડ્યો હતો. રોડ પર ખાડાના કારણે રાષ્ટ્રીય રાજપૂત કરણી સેનાના વલસાડ જિલ્લા પ્રમુખ અને ગુજરાત કરણી સેનાના કોર કમિટી સભ્ય અલોકસિંહ દમણ કરણી સેનાના પ્રમુખ કનકસિંહ જાડેજાની કાર અન્ય કાર સાથે અથડાયી હોવાનું જાણવા મળી રહ્યું છે.
માહોલ ગરમાતાં પોલીસ કાફલો ઘટનાસ્થળે
આ મામલે સ્થાનિક લોકોને જાણ થતાં તાત્કાલિક દોડી જઇ પોલીસને જાણ કારવામાં આવી હતી.જ્યાં જઈ પોલીસે તપાસ હાથ ધરતા કરણી સેનાના દમણના અધ્યક્ષ કનકસિંહ જાડેજાનું અકસ્માતમાં મૃત્યુ થયું હોવાનું સામે આવ્યું હતું. આ ઉપરાંત અકસ્માતની ઘટનામાં રાષ્ટ્રીય રાજપૂત કરણી સેના વલસાડ જિલ્લાના અધ્યક્ષ આલોકસિંહ સહિત અન્ય વ્યક્તિને ઇજા પહોંચતા સારવાર અર્થે ખસેડવામાં આવ્યા હતા.આ ઘટનાથી રોષે ભરાયેલા કરણીસેનાના કાર્યકરોએ બગવાડા ટોલ નાકા પર હલ્લાબોલ કર્યો હતો. કરણી સેનાના કાર્યકરોએ ટોલ પ્લાઝાના કર્મચારી સામે રોષ ઠાલવ્યો હતો. જ્યાં માહોલ ગરમાતાં પોલીસ કાફલો ઘટના સ્થળે ગયો હતો અને પોલીસની સમજાવટથી મામલો થાળે પાડયો હતો.
