મેઘમહેર / ગુજરાતમાં સર્વત્ર વરસાદથી ખેડૂતોમાં ખુશીની લહેર, જાણો તમારા શહેરમાં કેટલો પડ્યો વરસાદ

• સૌરાષ્ટ્રમાં મેઘરાજાની મેઘમહેર
• સૌરાષ્ટ્રમાં સાર્વત્રિક વરસાદથી ખેડૂતોમાં ઉત્સાહનો માહોલ
• ગીર સોમનાથમાં ધોધમાર વરસાદને કારણે નદીઓમાં પાણીની આવક

ગીર સોમનાથમાં સાર્વત્રિક વરસાદથી ધરતીપુત્રોમાં ઉત્સાહ 

સૌરાષ્ટ્રમાં ગીર સોમનાથ જિલ્લામાં સાર્વત્રિક વરસાદથી ધરતીપુત્રોમાં ઉત્સાહ જોવા મળ્યો છે. ગીર સોમનાથના ગીરગઢડામાં 2 ઈંચ, સૂત્રાપાડા અને તાલાળામાં 1.5 ઈંચ વરસાદ પડ્યો છે. સોમનાથના ગીરગઢડામાં સૌથી વધુ વરસાદ પડ્યો છે. જ્યારે વેરાવળ, કોડિનાર અને ઉના તાલુકામાં સારા વરસાદથી પાકને જીવતદાન મળ્યું છે. તાલાલા ગીરમાં ધોધમાર વરસાદ પડતા ગામમાં નદી વહેતી થઈ છે. છેલ્લાં ત્રણ કલાકથી સતત વરસાદ પડી રહ્યો છે. તો ધોધમાર વરસાદને કારણે નદીઓમાં પાણીની આવક થઈ છે.

વેરાવળ સહિત ગ્રામ્ય વિસ્તારોમાં ધોધમાર વરસાદ

ગીર સોમનાથ જિલ્લાના વેરાવળ સહિત ગ્રામ્ય વિસ્તારોમાં ધોધમાર વરસાદ પડતા વેરાવળના ભેટાળી ગામે ખેતરોમાં પાણી ભરાયા છે. વેરાવળના ભેટાળી ગામે વરસાદ ખેંચાતા ખેડૂતો પરેશાન થયા હતા. જો કે, મેઘરાજાએ લાંબા વિરામ બાદ અમી છાંટણા કરતા ખેડૂતો આનંદીત બન્યાં છે. ધોધમાર વરસાદથી ખેડૂતોના પાકને જીવતદાન મળશે. ગીર સોમનાથમાં ધોધમાર વરસાદથી વોકળામાં પાણી આવ્યાં. આંબળાશ ગામે રસ્તા પર નદી વહી. જેપુર ગીર, ધરમપુર ગીર ગામે વોકળામાં પાણીની આવક નોંધાઈ. ધોધમાર વરસાદ પડતા રસ્તા પર વરસાદી પાણી ફરી વળ્યા.

દ્વારકામાં મેઘમહેરથી પાકને જીવતદાન

તો દેવભૂમિ દ્વારકા જિલ્લામાં ભારે વરસાદથી પાકને નવુ જીવતદાન મળ્યું છે. દ્વારકાના કલ્યાણપુર અને આસપાસના તાલુકાઓમાં સાર્વત્રિક મેઘમહેરથી પાકને જીવતદાન મળ્યું છે. જ્યારે જૂનાગઢના ભેંસાણમાં ધીમીધારે વરસાદથી ખેડૂતોમાં નવી આશા જાગી છે. ભેસાણ પંથકમાં ધીમીધારે બે ઈંચ વરસાદ પડ્યો છે.

રાજકોટના ગોંડલમાં સૌથી વધુ વરસાદ

રાજકોટ શહેરના અનેક વિસ્તારોમાં લાંબા વિરામ બાદ ધોધમાર વરસાદ પડ્યો છે. રાજકોટના ગોંડલમાં સૌથી વધુ સવારથી એક ઇંચથી લઇને દોઢ ઇંચ જેટલો વરસાદ પડ્યો છે. શહેરના મોટાભાગના તાલુકાઓમાં વરસાદ પડતા મગફળી, કપાસ સહિતના પાકને જીવતદાન મળ્યું છે. જેને પગલે ખેડૂતોમાં ખુશી ફેલાઈ છે. રાજકોટના વીરપુરમાં ભારે બફારા બાદ વરસાદનું આગમન થયુ છે. વીરપુરમાં સુકાતા પાકને જીવતદાન મળ્યું. તો પોરબંદરના બરડા પંથકમાં લાંબા વિરામ બાદ મેઘરાજાએ રિ-એન્ટ્રી કરી છે. પોરબંદરના બરડા, બગવદર, અડવાણા, સોઢાના, રોજીવાડા, સીમરમાં સારો વરસાદ આવતા ખેડૂતોના પાકને ફાયદો થયો છે.