ઘોર બેદરકારી / ભાવનગરમાં તંત્રની લાપરવાહી,પાણીની ટાંકીનો સ્લેબ થયો ધરાશાયી,મહિનાઓથી અશુદ્ધ પાણી પી રહ્યા છે લોકો

• ભાવનગર મનપા વોટર વર્કસ વિભાગની ઘોર બેદરકારી
• કાળિયાબીડ પાણીની ટાંકીનો સ્લેબ ધરાશાયી
• 17 લાખ લીટર પાણીની ક્ષમતા ધરાવતી ટાંકીનો સ્લેબ ધરાશાયી
   

ભાવનગરમાં મનપા વોટર્સ વિભાગની ઘોર બેદરકારી સામે આવી. એક તરફ પ્રજા પાસેથી પ્રાથમિક સુવિધાઓ આપવા માટે ટેક્સ વસૂલાય છે તો બીજી તરફ  પ્રજાની સુખાકારી જાળવવામાં લાપરવાહી દાખવવામાં આવે છે. ત્યારે ભાવનગરમાં તંત્રની ઘોર લાપરવાહી સામે આવી. ભાવનગર મનપા વોટર્સ વિભાગની ઢીલી નીતિને કારણે ભાવનગરની લાખો જનતા દૂષિત પાણી પીવા મજબૂર થઇ છે. 

કાળિયાબીડ પાણીની ટાંકીનો સ્લેબ ધરાશાયી 

વાત જાણે એમ છે કે ભાવનગરમાં પીવાનું પાણી પુરુ પાડતી કાળિયાબીડ પાણીની ટાંકીનો અચાનક સ્લેબ ધરાશાયી થઇ ગયો. રસ્તા વચ્ચો વચ આવેલી પાણીની મસમોટી ટાંકીનો સ્લેબ ધરાશાયી થતા અધિકારીઓ દોડતા થયા હતા. જો કે સ્લેબ તૂટીને ટાંકીમાં જ પડ્યો જેથી કોઇ જાનહાનિ થઇ નથી,  પરંતુ અહીં સવાલ એ થાય છે કે આવી જર્જરિત ટાંકી હોવા છતાં તંત્ર દ્વારા કેમ સમારકામ કરવામાં આવતુ નથી. જો આ ઘટનામાં કોઇ જાનહાનિ થઇ હોત તો જવાબદાર કોણ ?  પાણીની ટાંકી જર્જરિત થઇ ગઇ છે તેનાંથી શું તંત્ર અજાણ હતું ?

મહિનાઓથી લોકો અશુદ્વ પાણી પી રહ્યાં છે 

17 લાખ લિટરની પાણીની ક્ષમતા ધરાવતી આ ટાંકી અસંખ્ય લોકોની તરસ છીપાવે છે.  ત્યારે સ્લેબ પાણીની અંદર પડતા દૂષિત બનેલુ પાણી પીવા લોકો મજબૂર થયા છે. વળી આ દ્રશ્યોમાં જોઇ શકાય છે કે પાણીની ટાંકીનો ઉપરનો ભાગ તૂટી ગયો છે એટલે કે પાણીની ટાંકી ઉપરથી સાવ ખુલ્લી થઇ ગઇ છે. ત્યારે આવુ ધૂળિયુ અને પ્રદૂષિત પાણી કેમ પીવે જનતા ?  આ વાતને પણ એક મહિનો થઇ ગયો પરંતુ તંત્રના પેટનું પાણી નથી હલતું.  1 લાખ કરતા પણ વધારે લોકો આ પાણીની વપરાશ કરે છે ત્યારે જો કોઇ નાગરિક આવા ગંદા પાણીથી બીમારીનો ભોગ બને તો જવાબદાર કોણ ?

સળગતા સવાલ 

• ભાવનગરમાં કાળિયાબીડની પાણીની ટાંકી પ્રત્યે બેદરકારી કેમ ? 
• જર્જરિત પાણીની ટાંકી કેમ ઉતારી લેવામાં નથી આવતી ? 
• કાળિયાબીડની પાણીની ટાંકી કોઇનો ભોગ લે તે રીતે વાટ જોવાઇ રહી છે ? 
• ભાવનગર નગરપાલિકાના સત્તાધિશો શું કોઇ અઘટિત દુર્ઘટનાની રાહ જોઇ રહ્યા છે ? 
• ટાંકીમાં ગાબડું પડ્યું છે તેમ છતાં તેનો ઉપયોગ શા માટે કરાઇ રહ્યો છે ? 
• ભાવનગરનો વોટર વર્કસ વિભાગ કેમ કુભકર્ણ નિદ્રામાં છે ? 
• હાઇકોર્ટે અન્ય પાણીની ટાંકી મુદ્દે આદેશ જારી કર્યો છે,શું મનપા તેને ઘોળીને પી ગઇ છે ? 
• શું તંત્ર આ ટાંકી તૂટે તેની રાહ જોવે છે ?
• શા માટે તંત્ર ભાવનગરના રહીશોનો જીવ જોખમમાં મુકવા માગે છે ?
• સ્લેબ તુટ્યા બાદ તંત્રએ અત્યાર સુધીમાં શું કામગીરી કરી ?
• ભાવનગરની જનતાનો જીવ જોખમમાં મુકનાર અધિકારીઓ સામે પગલાં ક્યારે લેવાશે ?
• શા માટે ટાંકી છે તે વિસ્તારને પ્રતિબંધિત વિસ્તાર જાહેર નથી કરાયો ?
• સામાન્ય પ્રજાની મનપા અને તેના અધિકારીઓને કોઇ પડી જ નથી ?
• અશુદ્વ પાણીથી કોઇ રોગ-બિમારી ફેલાય તો જવાબદાર કોણ ?