બાપુનગર પોલીસની ગુંડાગીરી સામે આવી છે. બાપુનગરની એક મહિલાએ પતિ સાથે ઝઘડો થતાં 100 નંબર પર પોલીસ બોલાવી હતી. પોલીસે આરોપી પતિને કંઈ પણ પુછવાની તસ્દી લીધા વગર ઢોર માર માર્યો હતો. જેનો વીડિયો સામે આવ્યો છે. પીડિત આરોપીનાં ભાણેજે આ ઘટનાં અંગે પોલીસ કમિશનરને અરજી કરી છે. જાણો શું બન્યું હતું.
પતિ પત્નીનાં ઝઘડામાં પોલીસે કર્યું એવું કે જીવ આરોપીનો જોખમમાં મુકાયો
પોલીસનો યુવકને માર મારતો વીડિયો સામે આવ્યો
બાપુનગર પોલીસની ગુંડાગર્દી આવી સામે
બાપુનગર હાઉસિંગમાં પતિ -પત્ની વચ્ચે થયો હતો ઝઘડો
બાપુનગર ગુજરાત હાઉસિંગ બોર્ડમાં 603 / 3840 નંબરનાં મકાનમાં રહેતા ગીતાબેન વસંતભાઈ પરમાર અને તેમના પતિ વસંતભાઈ જેઠાભાઈ પરમાર વચ્ચે ઝઘડો થયો હતો. જેને પગલે ગીતાબહેને 100 નંબર ડાયલ કરી પોલીસ બોલાવી હતી. પોલીસ કન્ટ્રોલમાં મેસેજ મળતા પોલીસની GJ-18- G- 5663 નંબરની PCR વાન ઘટનાં સ્થળે પહોંચી હતી. આ વાનમાં રહેલાં પોલીસ વાળાઓએ વસંતભાઈને ઢોર માર માર્યો હોવાનો આક્ષેપ પરિવારજનો દ્વારા કરવામાં આવી રહ્યો છે.
પોલીસે માર મારી લોહી ધોઈ નાંખવા ડોલ ભરી પાણી નાંખ્યું
પોલીસે વસંતભાઈને કંઈ પણ પુછ્યાં વગર ઢોર માર મારીને પોલીસ વેનમાં બેસાડ્યાં હતાં અને તેમનું ગળું દબાવ્યું હોવાનો આક્ષેપ પણ પરિવારજનોએ કર્યો છે. તેમજ પોલીસ વસંતભાઈને વેનમાં બેસાડી પોલીસ સ્ટેશનમાં લઈ ગઈ હતી ત્યાં પણ તેને ઢોર માર માર્યો હતો. વસંતભાઈને ઈજા થતાં તેમના માથેથી લોહી વહી રહ્યું હતું ત્યારે પોલીસે તેમનાં પર 2-3 ડોલ પાણી ભરીને નાંખ્યું હતું. તેમજ પોલીસે વસંતભાઈને માર માર્યા બાદ 108 બોલાવી સારવાર કરાવી તેમને દવા લગાવી લોકઅપમાં બંધ કર્યાં હતાં.
આરોપીનાં ભાણેજે વીડિયો ઉતાર્યો
આ ઘટનાનો વીડિયો વંસતભાઈના ભાણેજ સૂર્યકાંત અમૃતભાઈ પરમાર ઉતારી રહ્યાં હતાં. જે જોઈને પોલીસે તેમનાં પર પણ હુમલો કર્યો હોવાનો આક્ષેપ પણ તેમણે કર્યો છે. સૂર્યકાંતભાઈએ ઉતારેલા વીડિયોમાં એક પોલીસવાળો વસંતભાઈને ઢસડી રહ્યો હોય તેવું નજરે પડી રહ્યું છે.
અંતે ન્યાય માટે પો.કમિશનરને અરજી કરાઈ
અંતે સૂર્યકાંતભાઈએ પોલીસે કાયદો હાથમાં લઈને વસંતભાઈને ઢોર માર માર્યો હોવાની અરજી પો. કમિશનર ઓફિસે કરી હતી. જેમાં તેમણે તેઓ વીડિયો ઉતારી રહ્યાં હતાં ત્યારે પોલીસવાળાએ તેમને માર માર્યો હોવાનો ઉલ્લેખ પણ કર્યો છે.