લગભગ દોઢ વર્ષ સુધી મહિલાની પુત્રીએ તેના સાવકા પિતા અને સાવકા ભાઈ દ્વારા જાતીય શોષણ સહન કર્યું. સ્થિતિ એવી આવી કે 3 થી 4 મહિના પહેલા તે માનસિક રીતે બીમાર થવા લાગી
જયપુરમાં યૌન શોષણની એક કાળજું કંપાવી દે તેવી ઘટના
સાવકા પિતા અને ભાઈએ જ યુવતીનું દોઢ વર્ષ યૌનશોષણ કર્યું
યુવતી માનસિક રીતે બીમાર થતાં મામલો સામે આવ્યો
જયપુરમાં યૌન શોષણની એક કાળજું કંપાવી દે તેવી ઘટના સામે આવતા હડકંપ મચી ગયો છે. વિગતો મુજબ એક મહિલાએ પોતાના પતિ સાથે છૂટાછેડા બાદ અન્ય પુરુષ સાથે લગ્ન કર્યા હતા. જોકે મહિલાને એક દીકરી અને તેના બીજા પતિને એક દીકરો હતો. આ દરમ્યાન અચાનક મહિલાની પુત્રી માનસિક રીતે બીમાર થઈ ગયા બાદ અનેક ચોંકાવનારા ખુલાસા થયા હતા. મહિલાની પુત્રીએ માતાનું બીજું લગ્ન જીવન ટકાવી રાખવા ઘણું સહન કર્યું હતું. જેમાં તે મહિલાના બીજા પતિ અને તેના પુત્ર દ્વારા અનેકવાર યૌન શોષણનો શિકાર બની હોવાનું ખૂલ્યું છે.
જયપુરમાં માતાના બીજા લગ્ન બચાવવા માટે 15 વર્ષની દીકરીએ પોતાનો જીવ જોખમમાં મૂકીને માનસિક રીતે બીમાર થઈ ગઈ હતી. જ્યારે માતાને પુત્રી સાથે થયેલી ક્રૂરતાની જાણ થઈ ત્યારે માતા-પુત્રી કેટલાય કલાકો સુધી ગળે મળીને રડ્યા. જે બાદમાં પોલીસને જાણ કરવામાં આવતા પોલીસ સ્ટેશને 8 કલમો હેઠળ કેસ દાખલ થયો છે. પોલીસે બળાત્કાર અને પોક્સોની કલમો હેઠળ કેસ નોંધીને આરોપીની શોધ શરૂ કરી છે. કરધની પોલીસ સ્ટેશનના અધિકારી બનવારી લાલ મીના આ કેસની તપાસ કરી રહ્યા છે.
કરધની પોલીસ સ્ટેશનના એસએચઓ મીનાએ જણાવ્યું કે, આ વિસ્તારમાં રહેતી સરકારી શિક્ષિકાએ 2008માં તેના પહેલા પતિથી છૂટાછેડા લીધા હતા. માતા અને પુત્રી કેટલાક વર્ષો સુધી એકલા રહેતા હતા અને વર્ષ 2020માં માતાએ બીજા લગ્ન કર્યા હતા. તેણીએ જે પુરુષ સાથે લગ્ન કર્યા તેને 18 વર્ષનો પુત્ર પણ હતો. પોલીસે જણાવ્યું કે, મહિલા સરકારી શિક્ષિકા છે. તે કામ પર જતી અને આ દરમ્યાન તેની 15 વર્ષની દીકરી ઘરે રહીને તેનો અભ્યાસ કરતી. પરંતુ લગભગ દોઢ વર્ષ સુધી તેણીએ તેના સાવકા પિતા અને સાવકા ભાઈ દ્વારા જાતીય શોષણ સહન કર્યું. સ્થિતિ એવી આવી કે 3 થી 4 મહિના પહેલા તેને માનસિક રીતે બીમાંર થવા લાગી.
સત્ય જાણીને માતા પણ ચોંકી ઉઠી
આ તરફ પોતાની પુત્રી સાથે શું થઈ રહ્યું છે તેની માતાને કંઈ જ ખબર ન હતી. માતાએ પુત્રીને મોટી હોસ્પિટલોમાં બતાવી અને ત્યારબાદ પુત્રીની સારવાર શરૂ થઈ. થોડા દિવસ પહેલા જ્યારે ખબર પડી કે, લગભગ દોઢથી બે વર્ષ સુધી તેનું સતત યૌન શોષણ કરવામાં આવ્યું તો તેની માતાના પગ નીચેથી જમીન સરકી ગઈ. દીકરીને પૂછતાં તેણે કહ્યું કે, તે નથી ઈચ્છતી કે તેના બીજા લગ્ન પણ તૂટે, તેથી તે તેના સાવકા પિતા અને સાવકા ભાઈનો જુલમ સહન કરતી રહી. આ સમગ્ર ઘટના બાદ હવે પોલીસે આરોપી પિતા-પુત્રની ધરપકડ કરવાની તૈયારીઓ કરી લીધી છે.