ક્રૂરતાની હદ વટાવી / મહેમદાવાદમાં પરપ્રાંતીય યુવકને ચોર સમજી લાકડીઓ લઈને તૂટી પડ્યું ટોળું, ટૂંકી સારવાર બાદ મોત

• ચોર સમજી યુવક પર તૂટી પડ્યા ગ્રામજનો
• યુવકને એટલો માર માર્યો કે તેનો જીવ જતો રહ્યો
• પોલીસે હત્યાનો ગુનો નોંધીને તપાસ હાથ ધરી 

શહેર હોય કે ગામ છેલ્લા ઘણા સમયથી ચોરીની ઘટનાઓ વધી ગઈ છે. જેને લઈને કેટલાય ગ્રામ્ય વિસ્તારોમાં તો ગ્રામજનો રાત્રે જાગીને પહેરો કરતા હોય છે. એમાંય રાત્રી દરમિયાન જો કોઈ અજાણ્યો ઈસમ પણ જોવા મળે તો ચોર સમજી તેને મારવામાં આવે છે અને કેટલીયે ઘટનામાં તો નિર્દોષ વ્યક્તિઓને મોતને ભેટવાનો વારો આવે છે. આવો જ બનાવ મહેમદાવાદ તાલુકામાંથી સામે આવ્યો છે. 

ચોર સમજી માર્યો ઢોર માર
અમદાવાદના ચાંગોદરના જીવણપુરા બાદ હવે મહેમદાવાદ તાલુકામાંથી મોબ લિંચિંગની ઘટના સામે આવી છે. ગઈકાલે રાત્રે મહેમદાવાદ તાલુકાના સુઢા વણસોલ ગામમાં પરપ્રાંતિય યુવકને ચોર સમજી નિર્દયતાથી માર મારતા યુવકનું સારવાર દરમિયાન મોત નિપજ્યું છે. પોલીસે હાલ આ સંદર્ભે ફરિયાદ દાખલ કરીને તપાસ હાથ ધરી છે.   

બેભાન થઈ ગયા સુધી માર્યો માર
મળતી માહિતી અનુસાર, ખેડા જિલ્લાના મહેમદાવાદના સુંઢા વણસોલ ગામમાં ગઈ રાત્રે એક યુવક આંટાફેરા મારી રહ્યો હતો. જેને પગલે ગ્રામજનોએ એકઠા થઈને આ યુવકને પકડી લીધો હતો. જે બાદ આ યુવકની પહેલા પૂછપરછ કરવામાં આવી હતી. જોકે, આ પરપ્રાંતિય યુવકની ભાષા ગ્રામજનો સમજી શક્યા ન હતા. જેના કારણે ગ્રામજનો આ યુવકને ચોર સમજીને તૂટી પડ્યા હતા. આ યુવકને ગ્રામજનોએ એટલી હદે માર માર્યો હતો કે, તડફડતો રહ્યો પરંતુ ગ્રામજનો દ્વારા તાલિબાની સજા આપતા હોય તેમ માર મારવાનું બંધ કર્યું નહોતું. જેને લઈને યુવક બેભાન થઈ ગયો હતો. 

ટૂંકી સારવાર બાદ મોત
આ અંગેની જાણ થતાં મહેમદાવાદ પોલીસની ટીમ ગામમાં દોડી આવી હતી અને યુવકને સારવાર માટે હોસ્પિટલ ખાતે ખસેડ્યો હતો. હોસ્પિટલમાં ટૂંકી સારવાર બાદ યુવકનું મોત નીપજ્યું હતું. પોલીસની પ્રાથમિક તપાસમાં મૃતક છત્તીસગઢનો હોવાનું અને અમદાવાદમાં મેટ્રો પ્રોજેક્ટમાં કામ કરતો હોવાનું સામે આવ્યું હતું. હાલ પોલીસે હત્યાનો ગુનો નોધી આગળની કાર્યવાહી હાથ ધરી છે.

યુવકને ચોર સમજી ઢોરમાર મારતા મોત
અત્રે ઉલ્લેખનીય છે કે, સોમવારે ચાંગોદર પાસે આવો જ બનાવ બન્યો હતો. ચાંગોદર નજીક આવેલા જીવણપુરા ગામમાં ચોર સમજીને એક નેપાળી યુવકને થાંભલા સાથે બાંધી લાકડીઓથી એવો માર મારવામાં આવ્યો હતો કે યુવકનું મોત થઇ ગયું હતું. આ હત્યાના કેસમાં પોલીસે 10 આરોપીની  ધરપકડ કરી છે.