એક વિવાહ એસા ભી / Google Meet પર થશે લગ્ન, Zomato થી મહેમાનોને પહોંચી જશે ભોજન: અનોખા ઓનલાઈન વિવાહ જાણી ચોંકી જશો

• કોરોનાકાળમાં હવે લગ્ન પણ ડિઝીટલ
• પ.બંગાળનું કપલ કરશે ડિઝીટલ લગ્ન
• ગૂગલ મીટ પર ભેગા થશે આમંત્રિતો 

આજનો યુગ ડિઝીટલ યુગ ગણાય છે. અહીં પૈસાથી માંડીને મીટિંગો તથા લોકાર્પણ સહિતના તમામ વ્યવહારો ડિઝીટલી થાય છે. ઘરે બેઠા રેસ્ટોરન્ટનું જમવાનુ મળી જાય ઘરે બેઠા જ શોપિંગ થઇ જાય અને ઘરે બેઠા બિલ પણ ભરાઇ જાય. જો બધી વસ્તુ ડિઝીટલી શક્ય બની રહી હોય તો પછી લગ્ન કેમ નહી ?  સાંભળીને તમને એમ લાગે કે લગ્ન થોડી ડિઝીટલી થાય. પરંતુ કોરોના કાળમાં આ પણ શક્ય બનશે. કારણ કે પશ્ચિમ બંગાળના એક કપલે ડિઝીટલ વેડિંગનુ આયોજન કર્યુ છે એટલે કે કોરોનાના નિયમોનું 100 ટકા પાલન અને 100 ટકા એન્જોયમેન્ટ તો ખરુ જ.

ગૂગલ મીટ પર વેડિંગ
 
આ કપલ કોરોનાને લીધે લગ્ન સમારંભ યોજી શકતુ ન હતુ. વળી લગ્નમાં ઓછા લોકો બોલાવવાની સરકારની ગાઇડલાઇન મુજબ લગ્નનુ આયોજન થઇ શકતુ ન હતુ. વળી જો કોઇ લગ્નમાં આવે અને કોરોના થયો તો. આ બધી ચિંતાઓને લીધે કપલે વિચાર્યુ કે ડિઝિટલ લગ્ન કરીએ. તેઓએ 300થી વધારે મહેમાનોને આમંત્રણ આપ્યુ છે.  જો કે આ બધા જ કોઇ હોલ કે બેન્કવેટમાં નહી મળે. આ તમામ મહેમાનો ગૂગલમીટ પર ભેગા થશે. ત્યાં જ લાઇવ ટેલિકાસ્ટથી તેઓ મેરેજ અટેન્ડ કરશે.

ભોજન સમારંભ ઘરે બેઠા

અત્યારે કોઇ પણ વસ્તુ તમે ઘરે બેઠા મંગાવી શકો છો. તો આ તકનો લાભ લઇને આ કપલે પણ ભોજન દરેક આમંત્રિતોને તેમના ઘરે પહોંચાડવાનું નક્કી કર્યુ છે. ઝોમેટો થકી તેઓ આમંત્રિતોના ઘરે ભોજન પહોંચાડવામાં આવશે. મહેમાનો આરામથી ભોજન ખાતા ખાતા લાઇવ વીડિયો કોન્ફરન્સિંગથી લગ્ન સમારંભમાં સામેલ  થઇ શકશે.

મહેમાનો અપાશે લિંક અને પાસવર્ડ

આ કપલના લગ્નમાં સામેલ થવા માટે આમંત્રિતોને આગલા દિવસે લિંક અને પાસવર્ડ મોકલવામાં આવશે. જેના થકી તેઓ વીડિયો કોન્ફરન્સિંગના માધ્યમથી લગ્નમાં સામેલ થઇ શકશે.  ત્યારે ખરેખર આ પ્રકારના લગ્ન કોરોનાની મહામારી વચ્ચે ઉદાહરણરુપ સાબિત થશે. કોરોનાની ગાઇડલાઇનનું ઉલ્લંઘન કર્યા વગર જ લગ્ન પ્રસંગ સેલિબ્રેટ કરવામાં આવશે.