રોષ / નવસારીમાં શિક્ષિકાના માર બાદ આઘાતમાં આવી વિદ્યાર્થિનીએ આપઘાત કર્યો હોવાનો આક્ષેપ, પોલીસની સામે શાળામાં ભીડનો હોબાળો

ચીખલીના મલવાડા ગામે શાળામાં હોબાળો 
ધો.12ની વિદ્યાર્થિનીના આપઘાત બાદ શાળામાં હોબાળો
શાળાના આચાર્યા સામે વિદ્યાર્થિનીને મારવાના આક્ષેપો

ચીખલીના મજીગામે આવેલી નયનાબેન મકનભાઈ પટેલ શાળામાં ધોરણ 12માં અભ્યાસ કરતી મલવાડા ગામની દ્રષ્ટિ પટેલની નામની વિદ્યાર્થિનીએ આપઘાત કરી લેતા ખળભળાટ મચી ગયો છે. 

મારના આહતથી વિદ્યાર્થિનીએ ઘરે આપઘાત કર્યો હોવાનો આક્ષેપ 
મળતી માહિતી અનુસાર, મજીગામની નયનાબેન મકનભાઈ પટેલ શાળાની ધોરણ 12ની વિદ્યાર્થિની દ્રષ્ટિ પટેલે ગતરોજ આત્મહત્યા કરી લીધી હતી. જે બાદ વાલીએ આક્ષેપ કર્યો હતો કે, નયનાબેન મકનભાઈ પટેલ શાળાની શિક્ષિકાએ દ્રષ્ટિને માર માર્યો હતો. શાળાની શિક્ષિકાએ એકમ કસોટીની નોટબુક ઘરે રહી જતા દ્રષ્ટિને માર માર્યો હતો, મારના આહતથી દ્રષ્ટિએ ઘરે આપઘાત કર્યો હોવાનો આક્ષેપ પરિવાર દ્વારા કરવામાં આવ્યો હતો. 

ધો.12ની વિદ્યાર્થીનીના આપઘાત બાદ શાળાએ હોબાળો
શાળાના આચાર્યા સામે વિદ્યાર્થિનીને મારવાના આક્ષેપો કરાતા આજે ગ્રામજનો તેમજ વાલીઓ નયનાબેન મકનભાઈ પટેલ શાળા ખાતે પહોંચ્યા હતા અને હોબાળો મચાવ્યો હતો. વાલીએ શાળાએ વિદ્યાર્થીઓ અને શિક્ષકોને શાળામાં જતા અટકાવ્યા હતા. તો ગામના લોકોએ આચાર્યાના પતિને મેથીપાક ચખાડ્યો હતો.

ગ્રામજનોમાં આક્રોશ, શાળા બંધ કરાવવાની માંગ
મોટી સંખ્યામાં ગામના લોકો શાળાએ પહોંચતા ચીખલી પોલીસની ટીમ નયનાબેન મકનભાઈ પટેલ શાળા ખાતે દોડી આવી હતી. પોલીસ દ્વારા આ મામલે તપાસ કરવામાં આવશે તેવી બાંહેધરી આપવામાં આવી હતી.  ગામની દીકરીએ આપઘાત કરી લેતા ગ્રામજનોમાં આક્રોશ જોવા મળી રહ્યો છે. ગ્રામજનો શાળા બંધ કરાવવાની માંગ કરી રહ્યા છે.