હિંમત / રાજકોટમાં સ્કૂલબસ ડ્રાઈવરને અચાનક આવ્યો હાર્ટઍટેક, દીકરીએ સ્ટિયરિંગ હાથમાં લઈ બચાવ્યા જીવ

• રાજકોટમાં વિદ્યાર્થિનીની સમયસૂચકતાથી મોટી દુર્ઘટના સ્હેજમાં ટળી
• સ્કૂલ બસના ડ્રાઇવરને હાર્ટએટેક આવતા તેણે સ્ટિયરિંગ પરથી કાબૂ ગુમાવ્યો હતો
• વિદ્યાર્થિનીએ હિંમતભેર બસનું સ્ટિયરિંગ ફેરવી દેતા મોટી દુર્ઘટના ટળી

રાજકોટ શહેરના ગોંડલ રોડ ઉપર એક સ્કૂલ બસના ડ્રાઇવરને ચાલુ બસે હાર્ટએટેક આવતા તેણે સ્ટિયરિંગ પરનો કાબૂ ગુમાવ્યો હતો. જોકે આ સમયે તેની નજીકમાં બેસેલી એક વિદ્યાર્થિનીએ ગજબ સ્ફૂર્તિ બતાવી હતી અને હિંમતભેર બસનું સ્ટિયરિંગ ફેરવી દેતા બસ બે કાર અને બે બાઇકને હડફેટે લઈને નજીકમાં રહેલા વીજપોલ સાથે ધડાકાભેર અથડાઈ બંધ પડી ગઈ હતી. ઘટનાને પગલે પોલીસ કાફલો ત્યાં દોડી ગયો હતો. અને બસના ડ્રાઇવરને સારવાર માટે ખસેડી આ મામલે વધુ તપાસ હાથ ધરી છે. જોકે સૌ કોઈ વિદ્યાર્થિનીએ દાખવેલી સમયસૂચકતાને બિરદાવી રહ્યા છે. 

વિદ્યાર્થીનીએ ગભરાઈ જવાને બદલે ગજબની હિંમત દાખવી હતી
જાણવા મળતી વિગત મુજબ ગોંડલ રોડ પર સત્ય વિજય આઈસ્ક્રીમની નજીકથી ભરાડ સ્કૂલની બસ પસાર થઈ રહી હતી. બરાબર આ સમયે આ બસના ડ્રાઈવર હારુનભાઈ ખીરાણીને અચાનક હાર્ટએટેક આવતા તેમણે સ્ટિયરિંગ પરથી પોતાનો કાબૂ ગુમાવ્યો હતો. આ સમયે નજીકમાં બેઠેલી એક વિદ્યાર્થીનીએ ગભરાઈ જવાને બદલે ગજબની હિંમત દાખવી હતી. અને આ વિદ્યાર્થિનીએ તાત્કાલિક બસનું સ્ટિયરિંગ બીજી દિશામાં ફેરવી દીધું હતું.

બસ વીજપોલ સાથે અથડાઈ બંધ થઈ ગઈ હતી
ઘટનાને નજરે જોનાર વિજયભાઈએ જણાવ્યું હતું કે, વિદ્યાર્થિનીએ દાખવેલી આ સમયસૂચકતાને કારણે સ્કૂલ બસ પાર્ક કરેલા બે બાઈક અને બે કારને ટક્કર મારીને નજીકનાં વીજપોલ સાથે અથડાઈ બંધ થઈ ગઈ હતી. ઘટનાને પગલે સ્થાનિકો મોટી સંખ્યામાં દોડી ગયા હતા. અને પોલીસ તેમજ 108ને જાણ કરવામાં આવી હતી. જેને લઈને દોડી ગયેલી 108 એમ્બ્યુલન્સ દ્વારા બસના ડ્રાઈવર હારુનભાઈ ખીરાણીને તાત્કાલિક સારવાર માટે સિવિલ હોસ્પિટલ ખાતે ખસેડાયા હતા. અને પોલીસે બસમાં રહેલા છાત્રોને તેમના ઘર સુધી પહોંચાડી આ મામલે વધુ તપાસ હાથ ધરી છે.