ચર્ચા / વિધાનસભાની ચૂંટણી પહેલા પાટીદાર સમાજની આવતીકાલે મહાબેઠક, મુખ્ય સંસ્થાઓના પ્રમુખો કરશે મંથન, જાણો એજન્ડા

• આવતીકાલે અમદાવાદ ખાતે મળશે પાટીદાર આગેવાનોની બેઠક
• વિશ્વઉમિયાધામ જાસપુર ખાતે મળશે બેઠક 

ગુજરાતમાં જેમ જેમ વિધાનસભા ચૂંટણી નજીક આવી રહી છે તેમ તેમ સામાજિક આગેવાનો પોત પોતાના સમાજની માંગોને લઈ સક્રિય થઈ ગયા છે. સરકાર સમક્ષ પ્રેશર પોલિટીક્સની રમત રમાઈ રહી છે. તો આ તરફ ગુજરાતમાં 14% વોટબેન્ક ધરાવતા પાટીદાર સમાજની મહાબેઠક મળી રહી છે.

પ્રમુખ-મંત્રીઓ અને ટ્રસ્ટીઓની બંધબારણે બેઠક ચર્ચાનો વિષય
આવતીકાલે અમદાવાદમાં વિશ્વઉમિયાધામ જાસપુર ખાતે  પાટીદારોની મુખ્ય સંસ્થાઓના પ્રમુખોની બેઠક મળશે. પ્રમુખ-મંત્રીઓ અને ટ્રસ્ટીઓની બંધબારણે યોજાનારી આ બેઠકમાં પાટીદાર સમાજના રીત રિવાજ, હાલ પ્રશ્નો તેમજ અનામત કેસ પરત અને PSIની ભરતીમાં સવર્ણ સમાજને થયેલાં અન્યાય મુદ્દે પણ ચર્ચા થશે. મહત્વનું છે કે પાટીદાર સમાજના આગેવાનોની આ બેઠક ચૂંટણી સમયે મળી રહી છે. ત્યારે બેઠકમાં થયેલા મંથન બાદ સરકાર સમક્ષ અમુક માગણીઓ એક જૂથ થઈ રાખવામાં આવી શકે જેનો સીધો ફાયદો સમાજને થઈ શકે છે. સાથે મુઝવતા સામાજિક મુદ્દા પર પણ એકમત થઈ કોઈ નિર્ણય સમાજ માટે જાહેર કરવામાં આવી શકે છે. 

કોણ કોણ રહેશે હાજર ? 

• વિશ્વ ઉમિયાધામના પ્રમુખ આર.પી.પટેલ
• ખોડલધામના પ્રમુખ નરેશ પટેલ
• સિદસરના જેરામભાઈ વાંસજાળિયા
• સમસ્ત પાટીદાર સમાજના પ્રમુખ વાલજી શેટા 

ક્યા મુદ્દે થશે ચર્ચા ? 

• યુવતીઓના મરજી મુજબના લગ્નોમાં માતા-પિતાની સંમતિ બાબતે
• PSIની ભરતીમાં સવર્ણ સમાજને થયેલાં અન્યાય મુદ્દે
• પાટીદારો સહિત ઓપન કેટેગરીને થઈ રહેલા અન્યાય અંગે
• PSI ભરતીના નોટિફિકેશનમાં સેક્શન 16 ઉલ્લંઘન મુદ્દે 
• બિનઅનામત આયોગ અને નિગમમાં પેન્ડીંગ પડેલા પ્રશ્નોના નિકાલ અંગે

પાટીદાર સમાજના આંદોલનકારી જૂથો નહીં લે બેઠકમાં ભાગ
મહત્વનું છે કે આ બેઠકમાં પાટીદાર સમાજના સામાજિક સંસ્થાના અગ્રણી સિવાય અન્ય કોઈ પણને પણ આ મહત્વની મીટિંગ માટે આમંત્રણ આપવામાં આવ્યું નથી. ખાસ કરીને આંદોલન સાથે  જોડાયેલા પાસ આગેવાનો તેમજ એસપીજી જેવા પાટીદાર સમાજના સક્રિય જૂથો આ બેઠકમાં ભાગ નહીં લે.