વાહનોના થપ્પા / મોદી સરકારના એક નિર્ણયના કારણે કંડલામાં 5000 ટ્રકનો ચક્કાજામ, ડ્રાઈવરો ગુસ્સે થતાં પોલીસમાં દોડધામ

• ટ્રકો ખાલી ન થતાં ડ્રાઈવરોમાં આક્રોશ
• કંડલા ખાતે પરિવહન સેવા ખોરવાઇ 
• 2 દિવસથી ઘઉં હેંડલીંગની કામગીરી પણ બંધ

કેન્દ્ર સરકાર દ્વારા તાજેતરમાં ઘઉંની નિકાસ પર શરતોને અધીન રોક લગાવી દેવામાં આવી છે. બજારમાં ઘઉંની કિંમતમાં ઝીંકાયેલ ભાવ વધારાને પગલે અને માર્ચ મહિનાની મધ્યમાં વાતાવરણમાં એકાએક ગરમી વધી જતાં ઘઉંમાં સ્ટાર્ચ અને પ્રોટીન વિકસવાની પ્રક્રિયા ખોરવાઈ ગઈ છે. જેને પગલે એકરદીઠ ઘઉંની ઉપજમાં ઘટાડાની ભીતિ સર્જાઇ રહી છે. આ પ્રશ્નોને લઈને સરકાર દ્વારા આ નિર્ણય લેવામાં આવ્યો હોવાનું જાણવા મળી રહ્યું છે. તેવામાં સરકારનાં આ એક નિર્ણયને પગલે કંડલામાં એકસામટા  5000 ટ્રકના થપ્પા લાગી ગયા છે. ચક્કાજામને પગલે કંડલામાં પરિવહન સેવા ખોરવાઇ છે તો ટ્રકચાલકોમાં આક્રોશનો જ્વાળા ભભૂકી રહ્યો છે.

 

ઘઉં ભરેલ ટ્રક અને ટેલરના થપ્પા
ઘઉંની નિકાસ પર કેન્દ્ર સરકારે લગાવેલ પ્રતિબંઘને પગલે કંડલા પોર્ટ પર ટ્રક અને ટેલરને ચક્કાજામ જોવા મળ્યો છે. કંડલા પોર્ટ પર ઘઉં ભરેલા 5000થી વધુ ટ્રક અને ટેલર અટવાઈને ઊભા છે. ઘઉંની નિકાસ પર પ્રતિબંધના નિર્ણય બાદ ટ્રક અને ટેલરને તંત્ર દ્વારા ખાલી કરવા ન દેવામાં આવતા હોવાની રાવ ઉઠી રહી છે. જેને લઈને ટ્રક ચાલકો મુશ્કેલીમાં મુકાયા છે. બીજી તરફ ટ્રક અને ટેલરના ચક્કાજામના કારણે કંડલા ખાતે અન્ય પરિવહન સેવા પણ ખોરવાઈ છે. ઘઉંના જથ્થાથી ખીચોખીચ ભરેલ ટ્રક ખાલી કરવા ન દેવાતા ટ્રક ચાલકોને અગાઉના અન્ય ભાડા જતા કરી દેવાની નોબત આવી પડી છે. જેથી તેની મુશ્કેલી વધી છે ઉપરાંત આર્થિક નુકસાની પણ સહન કરવાનો વારો આવ્યો છે. આથી ડ્રાઈવરોમાં આક્રોશ જોવા મળી રહ્યો છે. 

મામલો થાળે પાડવા પોલીસની કવાયત 
બીજી તરફ આ મામલે સ્થાનિક પોલીસને જાણ થતા પોલીસ પણ તત્કાલીક બંદર ખાતે  દોડી ગઈ છે. પોલીસ દ્વારા મામલો થાળે પાડવા અને અટવાયેલ પરિવહન સેવા રાબેતા મુજબ કરવા પ્રયાસો હાથ ધરવામાં આવ્યા છે. ઉલ્લેખનીય છે કે, નિકાસ પર પ્રતિબંધના લીધે કંડલા બંદરે 2 દિવસથી ઘઉં હેંડલીંગની કામગીરી પણ બંધ કરી દેવામાં આવી છે.