શિકાગોમાં ગઈ કાલે સીમંત (બેબીશાવર)ના ઉજવણી પ્રસંગે અચાનક આવી ચડેલા બે બદમાશોએ ગોળીબાર કરતાં પ્રસંગની મજા માણી રહેલા ચાર મોટી ઉંમરના અને બે બાળકો ઘાયલ થયાં હતાં.
અમેરિકાના શિકાગોમાં ગઈ કાલે સીમંત (બેબીશાવર)ના ઉજવણી પ્રસંગે અચાનક આવી ચડેલા બે બદમાશોએ ગોળીબાર કરતાં પ્રસંગની મજા માણી રહેલા ચાર મોટી ઉંમરના અને બે બાળકો ઘાયલ થયાં હતાં, જેમાં આઠ વર્ષના એક બાળકને છાતી અને પીઠમાં જ્યારે ૧૦ વર્ષની કિશોરીને પગમાં ગોળી વાગી હતી.
બેબીશાવરના પ્રસંગની ઉજવણીમાં મોટા ભાગનાં કુટુંબીજનો ભેગાં થયાં હતાં. તેઓ આ પ્રસંગની મજા માણી રહ્યા હતા ત્યારે બે હથિયારધારીઓ ત્યાં પહોંચી ગયા હતા અને અચાનક ગોળીબાર શરૂ કરી દીધો હતો, જેમાં કુલ છ લોકો ઘાયલ થયા હતા. પોલીસ પહોંચી ત્યારે હથિયારધારી ભાગી જવામાં સફળ રહ્યા હતા.
શિકાગો પોલીસના પ્રવકતા એન્થની ગુગલીલમીએ જણાવ્યું હતું કે આ દુખદ ઘટના છે. અત્યારે સારવાર લઈ રહેલાં આઠ અને દશ વર્ષનાં બાળકો જે ઘાયલ થયાં છે તેમની હાલત નાજુક છે. તેઓ અત્યારે સંઘર્ષ કરી રહ્યાં છે. આ પ્રસંગની ઉજવણીમાં ૧૨થી વધારે લોકો ઘરની બહાર એકઠા થયા હતા તે સમયે બે હથિયારધારી ચાલતા આવ્યા હતા અને અચાનક સાંજના ૬.૩૦ કલાકે તેમણે ગોળીબાર શરૂ કરી દીધો હતો. તેમણે અનેક રાઉન્ડ ફાયર કર્યા હતા. બંને બાળકોનાં નામ જાહેર કરાયાં નથી, પરંતુ તેમની સ્થિતિ અત્યારે પણ ગંભીર છે.