અમેરિકાની એક હોસ્પિટલમાં ખુબ જ ચોંકાવનારી ઘટના સામે આવી છે. યુએસની એક ચાઈલ્ડ કેર હૉસ્પિટલમાં 36 નર્સ એક સાથે પ્રેગનન્ટ બની છે. આ ઘટના મિસૂરીની ચિલ્ડ્રન મર્સી કેન્સેસ હૉસ્પિટલની છે. આ અમેરિકાની શ્રેષ્ઠ ચિલ્ડ્રન હૉસ્પિટલ ગણાય છે. અહીં નિયોનેટલ ઈન્ટેન્સિવ કેર યુનિટ (એનઆઈસીયુ)ની 36 નર્સ એક જ વર્ષમાં પ્રેગનન્ટ બની છે.
અત્યાર સુધીમાં 20 નર્સની પ્રસૂતી થઈ ચૂકી છે. આ વર્ષના અંત સુધીમાં બાકીની નર્સ સંતાનને જન્મ આપવાની છે. આ હોસ્પિટલે ફેસબુક પેજ પર નર્સોનો એક ગ્રુપ ફોટો શેર કર્યો છે. ફોટોના કેપ્શનમાં જણાવવામાં આવ્યું છે કે, અમારા ઈન્ટેન્સિવ કેર નર્સરીની નર્સે અહીં આવનારા બાળકોની સેવા માટે દિવસ-રાત વીતાવ્યા. એ પણ એ સમયે જ્યારે તેઓ ખુદ ગર્ભવતી હતી. આઈસીએનના આ પરિવારને અભિનંદન.
સૌથી રસપ્રદ વાત એ છે કે, આ ફોટોગ્રાફ જૂન મહિનામાં લેવામાં આવ્યો હતો. આ તસ્વીરમાં તમામ નર્સો અને તેમના વર્ષ 2019માં જ જન્મેલા બાળકો અને કેટલીક ગર્ભવતી નર્સો નજરે પડે છે. અન્ય એક રસપ્રદ માહિતી એ પણ છે કે, અત્યાર સુધીમાં જન્મ લેનારા આ 20 બાળકોમાં ફક્ત બે જ છોકરી છે, જ્યારે બાકીના તમામ છોકરા છે.
એક અંગ્રેજી અખબારના અહેવાલ અનુસાર, ચિલ્ડ્રન મર્સી કેન્સેસ હૉસ્પિટલની એક નર્સ એલિસન રોન્કોએ બહુ મજેદાર અનુભવ શેર કર્યો હતો. તેણે જણાવ્યું કે, હોસ્પિટલમાં આવતા પેશન્ટ અને તેમના સગા-વ્હાલા એવી મજાક ઉડાવે છે કે, આ હોસ્પિટલનું પાણી ત્યારે જ પીજો જ્યારે તમારે પ્રેગનન્ટ થવું હોય. એલિસન રોન્કે આ વર્ષની શરૂઆતમાં જ એક પુત્રને જન્મ આપ્યો હતો.
હૉસ્પિટલના મેનેજમેન્ટના જણાવ્યા અનુસાર, આ પ્રકારની ઘટના અગાઉ ક્યારેય બની નથી. સ્ટાફની 36 નર્સ એક જ વર્ષમાં પ્રેગનન્ટ બને એ વાત અમારા માટે પણ રોમાંચક અને નવા પડકાર સમાન છે તેવું એક અધિકારીએ જણાવ્યું હતું.