મેઘરજ / દરવાજા બંધ રાખજો! 2 ગઠીયાઓએ ઘરમાં ઘુસી મહિલાને પાવડર નાખી કરી બેભાન, દાગીના લૂંટીને ફરાર

• અરવલ્લીના મેઘરજમાં ધોળા દિવસે લૂંટની ઘટના 
• ગોકુલનાથજી મંદિર નજીક 2 મહિલાઓ સાથે લૂંટ
• 2 ગઠીયા ઘરમાં ઘુસીને સોના-ચાંદીના દાગીના લૂંટીને ફરાર 

અરવલ્લીના મેઘરજમાં ધોળા દિવસે ગોકુલનાથજી મંદિર નજીક 2 મહિલાઓ સાથે લૂંટની ઘટના સામે આવી છે.  લૂંટની ઘટનાને અંજામ આપી લૂંટારાઓ ફરાર થઇ ગયા હતા. મહિલા પર  પાવડાર છાંટીને 2 ગઠીયાઑ સોના ચાંદીના દાગીના લૂંટી ફરાર થઇ જતાં પોલીસ દોડતી થઇ છે. 

ગોકુલનાથજી મંદિર નજીક 2 મહિલાઓ સાથે લૂંટ
અરવલ્લીના મેઘરજમાં ધોળા દિવસે લૂંટની ઘટના સામે આવી છે.  19 સપ્ટેમ્બરના રોજ લૂંટના ઇરાદે લોખંડની જાળી કુદીને 2 બુકાનીધારીઑ મહિલાના ઘરમાં  ઘૂસ્યા હતા. આ દરમિયાન લૂંટારુએ  મહિલાઓ પર પાવડર નાખીને મહિલાને બેભાન કરી નાખી હતી.  ત્યારબાદ તિજોરીનો લોક તોડી સોના-ચાંદીના દાગીના લૂંટીને આરોપીઓ ફરાર થઇ ગયા હતા. મહિલાઓ ભાનમાં આવતા દાગીનાની લૂંટ થઈ હોવાનું સામે આવ્યુ હતું. સોનાની બુટી, ચેન  સહીત આશરે ત્રણ લાખના દાગીનાની લૂંટ થયાનું જાહેર થયું છે. 

મેઘરજ પોલીસને ઘટનાની જાણ થતા તપાસ શરૂ
ત્યારબાદ મહિલાઓને લૂંટની જાણ થતા મહિલાએ મેઘરજ પોલીસને જાણ કરી હતી.  જેને લઇને સ્થાનિક પોલીસ કાફલો ઘટના સ્થળે દોડી ગયો હતો. પોલીસે મહિલાઑના નિવેદન નોંધ્યા હતા અને આજુબાજુના સીસીટીવી  તપાસવા સહીતની કાર્યવાહી હાથ ધરી હતી. ઉલ્લેખનીય છે કે, ટ્રાફિકથી ભરચક્ક વિસ્તારમાં દિનદહાડે ચોરીની ઘટનાને લઇને  સ્થાનિકોમાં ફફડાટ ફેલાયો હતો.