ગોઝારો વાર / ગોંડલમાં હિટ એન્ડ રનની 2 ઘટનામાં 2ના મોતઃ હવેલીથી દર્શન કરી બહાર નીકળેલા શખ્સને કારે ટક્કર મારી

• રાજકોટમાં હિટ એન્ડ રનના બનાવ
• જેતપુરના ગોંડલ નજીક હિટ એન્ડ રનની 2 ઘટના
• બે ઘટનામાં 2 લોકોના કમકમાટી ભર્યા મોત

ગુજરાતમાં હિટ એન્ડ રનના બનાવો સામાન્ય બની ગયા છે. બેફામ કાર ચલાવતા ચાલકોને જાણે કોઈના જીવની પરવાહ ન હોય તેમ અકસ્માત સર્જી રસ્તા પર ચાલતા અને બાઈક સવાર  લોકોને અડફેટે લઈ રહ્યા છે. ત્યારે રાજકોટમાં પણ 2 હિટ એન્ડ રનની ઘટના સામે આવી છે. જેમાં 2 લોકોના ઘટનાસ્થળે જ મોત નીપજયાં છે.

હિટ એન્ડ રનની 2 ઘટના
રાજકોટના ગોંડલ નજીક જ હિટ એન્ડ રનની 2 ઘટના સામે આવી છે. હવેલીથી દર્શન કરી નીકળી રહેલ વ્યક્તિને પુરપાર ઝડપે આવી રહેલી કારે જોરદાર ટકકર મારી હતી. અચાનક જ કાળ બની આવેલી કારે રાહદારીને હવામાં ફંગોળી નાખ્યો હતો. જેમાં અકસ્માતનો ભોગ બનનાર વ્યક્તિને ગંભીર ઈજાઓ પહોંચી હતી. જે બાદ ઇજાગ્રસ્ત વ્યક્તિનું સારવાર દરમિયાન મોત નિપજ્યુ હતું. GJ-03-LR-3328 નંબરની કારે વ્યક્તિને અડફેટે લીધો હોવાની પ્રાથમિક માહિતી મળી રહી છે. પણ આરોપી કાર ચાલક અકસ્માત સર્જી ચાલ્યો ગયો હતો. 

જો તે વિસ્તારમાં બીજી હિટ એન્ડ રન ઘટનાની વાત કરીએ તો ઉદ્યોગ ભારતી પાસે પણ કાર ચાલકે બાઇકસવાર વ્યક્તિને ભયંકર રીતે અડફેટે લીધો હતો. અકસ્માતમાં બાઇક ચાલકનું મૃત્યુ થયું હતું. અકસ્માત સર્જી કાર ચાલક કાર મૂકી ફરાર થઈ ગયો હતો. મળતી માહિતી મુજબ ગોંડલ પોલીસને બંને ઘટનાઓ વિશે જાણકારી આપી દેવામાં આવી છે. પોલીસ હાલ કાર ચાલકની તપાસ કરી છે. બંને મૃતકોના અચાનક અકસ્માતમાં મોત થવાથી પરિવાર પર આભ ફાટી પડ્યું છે.હાલ તો બંને ઘટનાના મૃતકને પીએમ અર્થે લઈ જવામાં આવ્યા છે.