કુરચે કુરચા / ખેડાના લસુન્દ્રા પાસે કાર અને મોપેડ વચ્ચે ટક્કર, દંપતીનું ઘટનાસ્થળે મોત, ખરાબ રસ્તાને કારણે અકસ્માતનું અનુમાન

• ખેડાના લસુન્દ્રા પાસે અકસ્માત
• ઘટનામાં દંપતીનું મૃત્યુ
• ખરાબ રસ્તાને કારણે અકસ્માત થયાનું અનુમાન

ગુજરાતમાં ચકાચક રોડ રસ્તાની વાતો થયા છે પણ ચોમાસા બાદ આ રસ્તા પર ભ્રષ્ટાચારના ખાડા રસ્તે રસ્તે જોવા મળે છે. આ ખાડાઓ વાહન ચાલકના જીવને જોખમમાં મૂકે છે. વારંવાર તંત્રના કાને વાત પહોંચાડવામાં આવે છે પણ તંત્રને ન તો રસ્તાને પડી છે ન તો વાહન ચાલકના જીવની... ખેડાના લસુન્દ્રામાં થયેલો અકસ્માત આ વાતની ચાડી ખાય છે.

ખરાબ રસ્તાએ 2નો જીવ લીધો?
ખેડા જિલ્લાના લસુન્દ્રા પાસે કાર અને મોપેડ વચ્ચે મોતની ટક્કર થઈ હતી. જેમાં ઘટનાસ્થળે જ મોપેડ ચાલક દંપતીનું કમકમાટી ભર્યું મોત નીપજ્યું હતું. નડિયાદથી બાલાસિનોર ખાતે દંપતી જઈ રહ્યું હતું તે સમયે કાર સાથે અથડાઇ ગયા હતા. અકસ્માત એટલો ભયાવહ હતો કે મોપેડના કુરચે કુરચા ઉડી ગયા હતા અને કાર ફંગોળાઈ હાઈવે નજીકની ખીણમાં ખાબકી હતી. અકસ્માતને નજરે જોનાર રાહદારીઓ અને વાહન ચાલકો તેમજ સ્થાનિકો આક્ષેપો લગાવી રહ્યા છે કે ખરાબ રસ્તો આ અકસ્માતનું કારણ છે.

ઘટનાની જાણ થતા જ કઠલાલ પોલીસ ઘટનાસ્થળે
અકસ્માતની જાણ કઠલાલ પોલીસને કરવામાં ઘટનાસ્થળે પહોંચી તપાસ આદરી છે. બીજી તરફ હાઈ-વે ઓથોરિટીના અધિકારીઓ પણ ઘટનાસ્થળે પહોંચ્યા હતા. હાલ બંને મૃતદેહોને નજીકની હોસ્પિટલમાં પીએમ અર્થે ખસેડવામાં આવ્યા છે. અકસ્માતને કારણે હાઈવે પર ટ્રાફિક જામના દ્રશ્યો સર્જાયા હતા. પોલીસે મૃતકના પરિવારને જાણ કરતાં સંબંધીઓ પણ અધ્ધર શ્વાસે ઘટનાસ્થળે દોડી આવ્યા હતા અને કરૂણ દ્રશ્યો સર્જાયા હતા.