- રાજ્યમાં આગામી 5 દિવસ વરસાદની આગાહી
- જામનગર,પોરબંદર સહીતના વિસ્તારોમાં મેઘમહેર
- 100 કિમીની ઝડપે પવન ફૂંકાતા વાવાજોડા જેવી સ્થિતિ સર્જાઇ
લાંબા સમયના વિરામ બાદ રાજ્યમાં ફરી મેઘો સટાસટી બોલાવે તેવા એંધાણ વર્તાઇ રહ્યા છે. હવામાન વિભાગ દ્વારા રાજ્યમાં આગામી 5 દિવસ વરસાદની આગાહી કરવામાં આવી છે. કચ્છ, સૌરાષ્ટ્ર અને દક્ષિણ ગુજરાતમાં વરસાદ પડી શકે તેવી શક્યતાને લઈને ખેડૂતોને પણ સોનેરી આશા બંધાઈ છે. બંગાળમાં લો પ્રેશર સર્જાવાને કારણે વરસાદની સંભાવના વ્યક્ત કરાઇ રહી છે. દક્ષિણ ગુજરાતમાં 13 તારીખે ભારે વરસાદની વકી છે. જ્યારે વલસાડ, નવસારી, દમણ, ડાંગ, નર્મદા, ભરૂચમાં ભારે વરસાદની આગાહી કરવામાં આવી છે. ગાજવીજ સાથે સમગ્ર ગુજરાતમાં અતિભારે વરસાદ ખાબકી શકે છે. વધુમાં આજે ગાંધીનગર અમદાવાદમાં સામાન્ય વરસાદની શક્યતા રહેલી છે.
જામનગરમાં વાવાઝોડા જેવી સ્થિતિ
- જામનગરના અરલા ગામે વરસાદ સાથે 100ની ઝડપે પવન ફૂંકાતા વાવાજોડા જેવી સ્થિતિ સર્જાઇ હતી.
- ગીર સોમનાથના વેરાવળમાં પણ તેજ પવન સાથે ગ્રામ્ય વિસ્તારોમાં વરસાદ ખાબકયો હતો.
- પોરબંદરના બરડા પંથકમાં અડવાણા, સોઢાણા, ભેટકડી સહિતના ગામોમાં ધોધમાર વરસાદ થતા ખેડૂતોમાં ખુશી છવાઈ હતી.
- દ્વારકાના કલ્યાણપુર તાલુકાના ભોગાત,કુરંગા સહિતના ગામોમાં વરસાદ પડ્યો હતો.
- બોટાદ અને બરવાળાના કાપડિયાળી, ખમીદાણા, વહીયા, રોજીદ, કુંડળ, રામપરા સહીતના વિસ્તારમા ભારે પવન સાથે મેઘરાજાનું આગમન થયું હતું.
ભારેથી અતિભારે વરસાદ થશે:અંબાલાલ પટેલ
હવામાન નિષ્ણાત અંબાલાલ પટેલે પણ વરસાદને લઇને મોટી આગાહી કરી છે. હવામાન નિષ્ણાંત અંબાલાલ પટેલે આગાહી કરતા જણાવ્યું કે, બંગાળની ખાડીમાં વરસાદી સિસ્ટમ સક્રિય થતાં ગુજરાતમાં ભારે વરસાદ પડશે. આગામી દિવસોમાં રાજ્યમાં ભારેથી અતિભારે વરસાદ થશે. તેમણે જણાવ્યું કે, દક્ષિણ ગુજરાતમાં અતિભારે વરસાદની શક્યતા છે. ઉત્તર-મધ્યમ ગુજરાતમાં ભારેથી અતિભારે વરસાદ ખાબકશે.મધ્ય ગુજરાતના કેટલાક ભાગોમાં સામાન્ય વરસાદની આગાહી કરવામાં આવી છે. તો ગીર સોમનાથ, અમરેલી, ભાવનગરમાં ભારે વરસાદ પડશે. સાથે જ દક્ષિણ ગુજરાતમાં 6 ઈંચથી વધુ વરસાદ ખાબકી શકે છે એવું અંબાલાલ પટેલ દ્વારા કહેવામાં આવ્યું છે. આ સાથે હવામાન નિષ્ણાંત અંબાલાલ પટેલે જણાવ્યું છે કે, મુંબઈના ભાગોમાં 10 ઈંચથી વધુ વરસાદની શક્યતા છે.
