હુમલો / BIG NEWS: પાકિસ્તાનના બલૂચિસ્તાનમાં મોટો આતંકી હુમલો, 10 સૈનિકોના મૃત્યુ

• પાકિસ્તાનના બલૂચિસ્તાન પ્રાંતમાં મોટો આતંકી હુમલો થયો 
• આતંકવાદી હુમલામાં 10 જવાન શહીદ, એક આતંકી માર્યો ગયો
• સેનાના જવાબી કાર્યવાહીમાં ત્રણ આતંકીઓ ઝડપાયા  

પાકિસ્તાનના બલૂચિસ્તાન પ્રાંતમાં મોટો આતંકી હુમલો થયો 

જેમાં 10 જવાનો શહીદ થયા છે. મળતી માહિતી મુજબ, આ હુમલો પાકિસ્તાનના અશાંત દક્ષિણ-પશ્ચિમ બલૂચિસ્તાન પ્રાંતના કેચ જિલ્લામાં થયો હતો. જ્યારે આતંકવાદીઓ દ્વારા સુરક્ષાદળોની એક ચેકપોસ્ટને નિશાન બનાવવામાં આવી હતી. આ હુમલામાં દસ જવાનો શહીદ થયા હતા.

આતંકવાદી હુમલામાં 10 જવાન શહીદ, એક આતંકી માર્યો ગયો

પાકિસ્તાન સેનાએ ગુરુવારે આ હુમલાની માહિતી આપી હતી. સેનાના મીડિયા વિભાગ ઇન્ટર-સર્વિસ પબ્લિક રિલેશન્સ (ISPR)એ જણાવ્યું હતું કે 25-26 જાન્યુઆરીની વચ્ચેની રાત્રે આતંકવાદીઓ દ્વારા હુમલો કરવામાં આવ્યો હતો. સેનાના જણાવ્યા અનુસાર આ હુમલામાં 10 જવાનો શહીદ થયા હતા જ્યારે સેનાની જવાબી કાર્યવાહીમાં એક આતંકી માર્યો ગયો હતો અને ઘણા લોકો ઘાયલ થયા હતા.

જવાબી કાર્યવાહીમાં ત્રણ આતંકીઓ ઝડપાયા  

આ કાર્યવાહીમાં સેનાએ ત્રણ આતંકીઓને ઝડપી પાડ્યાં છે. હજુ સુધી કોઈ સંગઠનને આ હુમલાની જવાબદારી લીધી નથી. ઈરાન અને અફઘાનિસ્તાનની સરહદે આવેલા બલૂચિસ્તાન પ્રાંત લાંબા સમયથી હિંસક વિદ્રોહનું કેન્દ્ર છે. બલૂચ વિદ્રોહી જૂથોએ ભૂતકાળમાં આ ક્ષેત્રમાં ચીન-પાકિસ્તાન ઇકોનોમિક કોરિડોર પ્રોજેક્ટ્સને નિશાન બનાવીને અનેક હુમલા કર્યા છે.