વિદેશ જવાની ઘેલછામાં એક યુવકે નકલી ટીકીટ બનાવી. પરંતુ એરપોર્ટ પર મુસાફરી કરવા પહોંચતા તેનો ભાંડો ફૂટ્યો અને પોલીસના હાથે ઝડપાયો. કોમ્પ્યુટર એન્જીનીયર યુવકે કેમ બનાવી ટિકિટ.
યુવાનોમાં વિદેશ જવાની ઘેલછા
વિદેશ જવા માટે બધું કરવા તૈયાર
નકલી ટિકિટ બનાવી જવું હતું વિદેશ
બોડેલી તાલુકાના ક્રિષ્ના વિજય પટેલ નકલી ટીકીટ લઈને વિદેશ મુસાફરી કરવા જતાં ઝડપાઇ ગયો. આ યુવકે દોહા જવા માટેની ફ્લાઇટની ડુપ્લિકેટ ટીકીટ પોતાના લેપટોપમાં બનાવી હતી. અમદાવાદ ઇન્ટરનેશનલ એરપોર્ટ પર કતાર એરલાઇન્સની ટીકીટ વિન્ડો ખાતે ટીકીટ બતાવી હતી જે સમયે કતાર એરલાઇન્સના કર્મીઓને ટીકીટ ડુપ્લીકેટ હોવાની શંકા જતા તપાસ કરવામાં આવી હતી. ક્રિષ્ના પટેલને CISFના હવાલે કર્યો હતો અને CISFએ આ વ્યક્તિને એરપોર્ટ પોલીસને સોંપતા પોલીસે નકલી ટિકિટને લઈને ગુનો નોંધી આરોપીની ધરપકડ કરી.
યુવકે નકલી ટીકીટ બનાવવાનું ષડયંત્ર રચ્યું
પકડાયેલો આરોપી ક્રિષ્ના પટેલ પંચમહાલના બોડેલી ગામનો રહેવાસી છે. કોમ્પ્યુટર એન્જીનિયર થયેલ ક્રિષ્ના પટેલને વિદેશ જવાની ઈચ્છા હતી. 3 વખત IELTSની પરીક્ષા પાસ કરી પરંતુ વિદેશ જવાના વિઝા નહિ મળતા યુવકે નકલી ટીકીટ બનાવવાનું ષડયંત્ર રચ્યું. દોહાની ટીકીટ ઓનલાઈન ચેક કરીને આરોપીએ પોતાના લેપટોપમાં ટીકીટ બનાવી. આ ટીકીટ લઈને વિદેશ પ્રવાસ માટે એરપોર્ટ પહોંચી ગયો. પરંતુ તેની નકલી ટીકીટે તેનો ભાંડો ફોડી દીધો.
અમેરિકા જવાની ઘેલછામાં યુવાનો કાયદાનો ભંગ કરી રહ્યા છે, ખોટા વિઝા, નકલી પાસપોર્ટ, કે નકલી માર્કશીટ બનાવવાના કૌભાંડ બાદ હવે વિદેશની નકલી ટીકીટ બનાવીને વિદેશ જવાનું કાવતરું ઘડનાર યુવક કાયદાના સકંજામાં ફસાયો છે. કોમ્પ્યુટર એન્જીનીયર ક્રિષ્નાને વિદેશનો એટલો મોહ લાગ્યો કે તેને જેલ જવાનો વારો આવ્યો છે.