સ્પોર્ટ્સ / WWE સ્ટાર જોન સીનાએ પ્રેમિકા સાથે ગુપચુપ કર્યા લગ્ન, જુઓ તસવીરો

• બંનેએ ૧૨ ઓક્ટોબર ફ્લોરિડાના ટેમ્પામાં લગ્ન કર્યાં 
• જોન સીનાએ જરા  પણ હો-હા કર્યા વિના પ્રેમિકા સાથે લગ્ન કરી લીધાં
• આ જોડીએ થોડા મહિના પહેલાં જ સગાઈ કરી  હતી

WWE સ્ટાર જોન સીનાએ જરા  પણ હો-હા કર્યા વિના પ્રેમિકા શાય શરિતઝાદેહ સાથે લગ્ન કરી લીધાં છે. જોન મહિલા રેસલર નિકી બેલા સાથે થયેલા બ્રેકઅપ બાદ રેસલિંગ રિંગથી પણ દૂર થઈ ગયો હતો. આ દરમિયાન તેની મુલાકાત શાય સાથે થઈ. આખરે બંનેએ લગભગ એક વર્ષના ડેટિંગ બાદ લગ્ન કરી લીધાં છે. એવું જણાવવામાં આવી રહ્યું છે કે બંનેએ ૧૨ ઓક્ટોબર ફ્લોરિડાના ટેમ્પામાં લગ્ન કર્યાં છે. જોન ૪૩ વર્ષનો છે, જ્યારે શાયની ઉંમર ૩૧ વર્ષની છે.

આ જોડીએ થોડા મહિના પહેલાં જ સગાઈ કરી  હતી. ૧૬ વખતના વર્લ્ડ ચેમ્પિયન જોન અને શાયની મુલાકાત બ્રિટિશ કોલંબિયામાં 'પ્લેઇંગ વિથ ફાયર'ના સેટ પર થઈ હતી. બાદમાં ઓક્ટોબર-૨૦૧૯માં તેમણે 'પ્લેઇંગ વિથ ફાયર'ના પ્રીમિયર વખતે કેમેરા સામે હાથમાં હાથ પરોવીને પોતાના રિલેશનનો ખુલાસો કરી દીધો હતો. આ લગ્ન સમારંભમાં બહુ થોડા લોકો સામેલ થયા હતા અને આ લગ્નથી મીડિયાને દૂર રાખવામાં આવ્યું હતું.

શરિતઝાદેહ એન્જિનિયર છે અને તેણે યુનિવર્સિટી ઓફ બ્રિટિશ કોલંબિયાથી ઇલેક્ટ્રિકલ એન્જિનિયરિંગની ડિગ્રી મેળવી છે. હાલ શાય સોના ટાઇપમાં પ્રોડક્ટ મેનેજર તરીકે કામ કરી રહી છે. અગાઉ તે મોટોરોલા સોલ્યૂશનમાં પણ પ્રોડક્ટ મેનેજર રહી ચૂકી છે.

ઉલ્લેખનીય છે કે જોનનાં આ બીજાં લગ્ન છે. તેણે ૨૦૦૯માં એલિઝાબેથ હ્યૂબરડ્યુ સાથે લગ્ન કર્યાં હતાં. એ લગ્ન ત્રણ વર્ષ જ ચાલ્યાં હતાં. ત્યાર બાદ જોન WWE મહિલા રેસલર નિકી બેલા સાથે રિલેશનમાં હતો. નિકી સાથે જોન છ વર્ષ સુધી રિલેશનમાં રહ્યો હતો. આખરે ૨૦૧૮માં બાળક અંગેના અલગ અલગ વિચારોને કારણે તેઓ બંને અલગ થઈ ગયાં હતાં.