ધરપકડ / આર્થિક સંકડામણના કારણે મહિલાએ કેબિનેટ મંત્રીને આપી હતી જાનથી મારી નાખવાની ધમકી

મહિલાએ 28 જૂનથી 15 જૂલાઇ વચ્ચે અનેકવાર મંત્રી ઇશ્વરભાઇ પરમારને પત્ર લખી અને ધમકી આપી દોઢ કરોડની ખંડણી માગી હતી. ત્યારે મંત્રી ઈશ્વરભાઇ પરમારે બારડોલી પોલીસ મથકમાં ફરિયાદ નોંધાવતા પોલીસે મહિલાને ઝડપી પાડી છે.

મંત્રી ઈશ્વર પરમારને ખંડણી માટે ધમકી આપનારી મહિલાના CCTV ફૂટેજ સામે આવ્યા છે. CCTVમાં મહિલા ઓટલા પર કવર મુકી રહી હોવાનું દેખાય રહ્યું છે. મહિલા કવર મૂકીને ત્યાંથી નિકળી રહી છે. જોકે આ મામલે મંત્રી ઇશ્વર પરમારની ફરિયાદ બાદ મહિલાની પોલીસે ધરપકડ કરી છે. મહિલાએ આર્થિક સંકડામણને કારણે આ પગલું ભર્યું હોવાનુ સામે આવ્યું છે.

આ મામલે કેબિનેટ મંત્રી ઈશ્વર પરમારે જણાવ્યું હતું કે, મારા કલાર્કને કોઇએ બંધ કવરમાં લેટર આપ્યો હતો. જેમાં દોઢ કરોડની માંગણી કરી હતી.

પોલીસના જણાવ્યા અનુસાર, મંત્રીના કાર્યાલયના વ્યક્તિને કોઇએ ચિઠ્ઠી આપી હતી. જેમાં રૂપિયાની માંગણી કરવામાં આવી હતી. જેમાં કોઇ ઓળખ છતી કરવામાં આવી ન હતી. સુરેશ પરમારના ઘરે બીજી ચિઠ્ઠી મુકવામાં આવી હતી. જેમાં કેટલાક આક્ષેપો કરવામાં આવ્યા હતા. તેમના દીકરા અને માતાને ધમકી આપી હતી. ત્યારબાદ અંતે આ મહિલા ઝડપાઇ હતી.