દિલ્હી સહિત ઉત્તર ભારતમાં ઠંડીનો કહેર યથાવત જોવા મળી રહ્યો છે. જો કે હવામાન વિભાગ અનુસાર હજુ પણ પારો ગગડી શકે છે. દિલ્હી ખાતે ધૂમ્મસભર્યા વાતાવરણના પગલે વિઝિબિલીટી જીરો જોવા મળી. ઉત્તરાખંડમાં આજે અને આવતીકાલે ભારે હિમવર્ષાની આગાહી કરવામાં આવી છે.
ઉત્તરભારતમાં છેલ્લા 48 કલાકમાં ઠંડીથી 25 લોકોના મોત થયા છે. ઉત્તર પ્રદેશ સરકાર દ્વારા ગાઈડ લાઈન જાહેર કરવામાં આવી છે. લોકોએ કામ સિવાય બહાર ન નિકળવાની ગાઈડલાઈન જાહેર કરવામાં આવી છે. વધુ સ્પીડમાં વાહન ન ચલાવવાનું સૂચન કરાયું છે. રાજ્યમાં હજુ પણ ધુમ્મસમાં વધારો થઈ શકે છે. શાળાઓના સમયમાં ફેરફાર કરવા નિર્દેશ આપ્યા છે.
ઉત્તરાખંડમાં હિમવર્ષાની આગાહી
ઉત્તરાખંડમાં કેટલાક વિસ્તારોમાં આજે અને આવતી કાલે ભારે વરસાદ સાથે હિમવર્ષાની આગાહી કરવામાં આવી છે. પહાડી વિસ્તારો સહિત અન્ય ઉંચાઇવાળા વિસ્તારમાં વરસાદની સાથે હિમપ્રપાત પણ જોવા મળશે. જ્યારે નિચાણવાળા વિસ્તારો તેમજ મેદાની વિસ્તારમાં ધુમ્મસભર્યું વાતાવરણ રહેશે.
હવામાન વિભાગની આગાહી મુજબ ઉત્તરકાશી, ચમોલી, રુદ્રપ્રયાગ અને પિથોરગઢ જિલ્લામાં વરસાદની સાથે હિમવર્ષાનું અનુમાન પણ છે.