પત્નીએ બુરખો પહેરવાનો ઈનકાર કરતા પતિએ જાહેરમાં છરીના ઘા માર્યા, ઘટના સાંભળી રૂવાડા ઉભા થઈ જશે | wife refused to wear burqa husband killed her in mumbai
ઈકબાલ શેખે કરી પત્નીની હત્યા
રૂપાલી ન હતી કરતી મુસ્લિમ રિવાજોનું પાલન
રોષે ભરાયેલા શખ્સે કરી પત્નીની હત્યા
બુરખા અને હિજાબને લઈને ઘણા દેશોમાં વધી રહેલા હંગામા વચ્ચે મુંબઈથી ચોંકાવનારા સમાચાર સામે આવ્યા છે. ઇકબાલ મહેમૂદ શેખ નામના વ્યક્તિએ તેની પત્ની રૂપાલીની ગળું કાપીને હત્યા કરી કારણ કે તે મુસ્લિમ રિવાજોનું પાલન કરતી ન હતી અને બુરખો પહેરતી ન હતી. રૂપાલીએ ઈકબાલ સાથે આંતર-ધાર્મિક લગ્ન કર્યા હતા, પરંતુ તે ઈકબાલની જબરદસ્તીથી કંટાળી ગઈ હતી અને છૂટાછેડા માંગતી હતી. છૂટાછેડા પહેલા જ આરોપીએ તેની હત્યા કરી નાખી છે.
પત્નીને માર્યા છરીના ઘા
પોલીસના જણાવ્યા અનુસાર આરોપી ઇકબાલ શેખે સોમવારે રાત્રે તેની પત્ની રૂપાલીને છરીના ઘા મારીને મોતનો ઘાટ ઉતારી દીધી હતી. આ ઘટના મુંબઈના ચેમ્બુર વિસ્તારમાં બની હતી. આરોપી ઈકબાલની મુંબઈ પોલીસે ધરપકડ કરી લીધી છે.
ત્રણ વર્ષ પહેલા મુસ્લિમ યુવક સાથે કર્યા હતા લગ્ન
રૂપાલીએ ત્રણ વર્ષ પહેલા ઈકબાલ શેખ સાથે પ્રેમ લગ્ન કર્યા હતા. આ પછી બંને ચેમ્બુર વિસ્તારમાં આવેલા ઈકબાલના ઘરમાં રહેતા હતા. રૂપાલી હિંદુ હોવાથી અને લગ્ન પછી પણ તે મુસ્લિમ રિવાજોનું પાલન કરતી ન હોવાથી ઇકબાલ પોતે અને તેનો પરિવાર તેના પર નારાજ હતો. ઇકબાલનો પરિવાર રૂપાલી પર બુરખો પહેરવાનું દબાણ કરતો હતો. પરંતુ તે માનતી નહોતી. આ અંગે વિવાદ થયો હતો. આ પછી રૂપાલી અને ઈકબાલ અલગ રહેવા લાગ્યા. દંપતીને એક પુત્ર પણ છે.
મુસ્લિમ રિવાજો માટે કરતો હતો દબાણ
છ મહિનાથી અલગ રહેવા છતાં બંને ફોન પર વાત કરતા હતા. જો કે, આ સમય દરમિયાન પણ ઈકબાલ તેના પર મુસ્લિમ પરંપરાઓનું પાલન કરવા દબાણ કરતો હતો. રૂપાલી ઈકબાલની બીજી પત્ની હતી. પ્રથમ પત્નીને સંતાન ન હોવાથી તેણે તેને છૂટાછેડા આપી દીધા હતા.
મળવા બોલાવી જાહેરમાં કર્યુ મર્ડર
આરોપી ઈકબાલ શેખે રૂપાલીને સોમવારે સાંજે ચેમ્બુર વિસ્તારમાં પીએલ લોખંડે માર્ગ પર નાગેવાડી ખાતે મળવા બોલાવી હતી. આ દરમિયાન બંને વચ્ચે ફરીથી બુરખા અને અન્ય બાબતોને લઈને બોલાચાલી થઈ હતી. આના પર રૂપાલીએ છૂટાછેડાની માંગ કરી હતી.
બોલાચાલી અને તકરાર વધી જતાં ઇકબાલે ખિસ્સામાંથી છરી કાઢી રૂપાલીના ગળા પર ઘા ઝીંકી દીધો હતો અને ભાગી ગયો હતો. રૂપાલીનું ઘટનાસ્થળે જ મોત થયું હતું. હાજર લોકોએ પોલીસને જાણ કરી હતી. પોલીસે ઘટનાસ્થળે પહોંચી લાશને હોસ્પિટલ મોકલી આપી હતી. આરોપીની પૂછપરછ કરવામાં આવી રહી છે. તેની સામે હત્યાનો કેસ નોંધવામાં આવ્યો છે.