હેલ્થ / દુનિયામાં સૌથી વધુ મોત આ બીમારીને કારણે થાય છે : WHOનો ચોંકાવનારો રિપોર્ટ

ડાયાબિટીસ ઉપરાંત હવે ડિમેન્શિયા એટલે કે ભૂલવાની બીમારી પણ દુનિયાના એ ૧૦ રોગોમાં સામેલ છે જેણે સૌથી વધુ લોકોની જિંદગી છીનવી લીધી છે. 

ટોચની 10 બીમારીઓમાંથી 7 બીમારીઓ બિનચેપી છે

WHOએ એક હેલ્થ રિપોર્ટ જારી કર્યો હતો. જેમાં ૨૦૦૦ના વર્ષથી લઇને ૨૦૧૯ સુધીનો ડેથ રેકોર્ડ સામેલ કરાયો હતો. રિપોર્ટ મુજબ દુનિયાભરમાં જે ૧૦ રોગોથી સૌથી વધુ મૃત્યુ થયાં તેમાં સાત એવી બીમારીઓ છે જે એકથી બીજા માણસમાં ફેલાતી નથી. આવી બીમારીઓને નોન-કોમ્યુનિકેબલ ડિસીઝ કહેવાય છે. 

૨૦ વર્ષમાં હાર્ટ ડિસીઝથી થતા મૃત્યુમાં ૨૦ લાખથી વધુનો વધારો

છેલ્લા બે દાયકાના આંકડા ચોંકાવનારા છે. રિપોર્ટ મુજબ દુનિયાભરમાં બીમારીઓથી થતા મૃત્યુમાં ૧૬ ટકા ભાગીદારી હ્રદયરોગોની છે. છેલ્લાં ૨૦ વર્ષમાં ઇસ્કેમિક હાર્ટ ડિસીઝથી થતા મૃત્યુમાં ૨૦ લાખથી વધુનો વધારો થયો છે. ૨૦૧૯ સુધી આ આંકડો ૯૦ લાખ પહોંચી ગયો છે. બીજા નંબરે સ્ટ્રોક છે. 

શરીરની પ્રાથમિક તબક્કાની દેખભાળ જ આપણને બિમારીઓથી બચાવશે

WHOના ડિરેક્ટર-જનરલ ટેડ્રોસ અધાનોમ કહે છે કે આ આંકડા એક રિમાન્ડર જેવા છે જે જણાવે છે કે આપણે નોન- કોમ્યુનિકેબલ ડિસીઝનો ઝડપથી બચાવ, તપાસ અને ઇલાજ કરાવવાની જરૂર છે. શરીરની પ્રાથમિક તબક્કાની દેખભાળ જ આપણને એવી બિમારીઓથી બચાવશે અને વૈશ્વિક મહામારી સામે પણ લડશે.