કોરોનાથી સાજા થયેલા લોકોમાં બોન ડેથની સમસ્યા વધી રહી છે.
ફંગસ બાદ બોન ડેથે વધારી લોકોની મુશ્કેલી
બોન ડેથમાં હાડકા ઓગળી જાય છે
હાથ-પગ અને સાંધાઓમાં દુ:ખાવો મુખ્ય લક્ષણ છે
કોરોના દર્દીઓની પરેશાનીમાં થયો વધારો
તાજેતરમાં જ મુંબઈથી એક એવા સમાચાર આવ્યા છે જેનાથી કોરોનાના દર્દીઓની પરેશાનીમાં વધારો થયો છે. કોરોનાથી સાજા થયેલા લોકોમાં બોન ડેથની સમસ્યા વધી રહી છે. દર્દી એક બે મહિના પહેલા જ કોરોનાથી સજો થયો હતો જેથી બોન ડેથને પોસ્ટ કોવિડ કોમ્પ્લીકેશન નામ આપવામાં આવ્યું છે. જેમાં બ્લડ ટીશું સુધી લોહીનું સર્ક્યુલેશન પુરતી માત્રામાં ના થતા હાડકા ઓગળી જાય છે.
સ્ટેરોઈડના લીધે બોન ડેથની સમસ્યા વધી રહી છે
જાણકારોનું માનીએ તો સમયની સાથે આ બીમારીનો વ્યાપ વધી રહ્યો છે. કોરોનાના દર્દીઓની સારવાર માટે સ્ટેરોઈડનો ઉપયોગ કરવામાં આવે છે જેના લીધે કોરોનાથી સાજા થયેલા દર્દીઓમાં બોન ડેથની સમસ્યા વધી રહી છે. બોન ડેથમાં હાડકામાં સખત દુઃખાવા સાથે હાડકા ધીરે ધીરે ઓગળી જાય છે.
બોન ડેથ સીધા હાડકાને અસર કરે છે
ડોકટરોનું માનવું છે કે, બ્લેક ફંગસ નાક, ગળા, આંખ અને મગજને અસર કરતું હતું પરંતુ બોન ડેથ સીધા હાડકાને અસર કરે છે. બોન ડેથના દર્દીઓને પૂછવામાં આવતા તેમણે જણાવ્યું કે, સૌથી પહેલા તેમના ફીમર બોનમાં દુખાવો શરૂ થયો હતો. બોન ડેથની શરૂઆતમાં હાડકામાં અત્યંત દુખાવો થાય છે.
ભારતમાં બોન ડેથના 5 કેસ
અત્યાર સુધી ભારતમાં બોન ડેથના 5 કેસ આવ્યા છે. આ તમામ કેસ મુંબઈના છે. મુખ્ય બાબત એ છે કે, તમામ દર્દીઓની ઉંમર 40 વર્ષથી ઓછી છે. રીપોર્ટસ મુજબ કેટલાક બોન ડેથના દર્દીઓ ડોક્ટર પણ છે. બોન ડેથની શરૂઆતમાં જાંઘના વિસ્તારમાં આવેલા હાડકામાં દર્દ શરૂ થાય છે. ત્યારબાદ ચાલવામાં તકલીફ થાય છે, હાથ-પગ અને સાંધામાં દુઃખાવોએ તેના મુખ્ય લક્ષણ છે.
હાડકામાં દુઃખાવો હોય તો ડોક્ટરની સલાહ લેવી જરૂરી
બોન ડેથની સમસ્યાના ઈલાજ માટે દુનિયાભરના ડોકટર્સ કાર્યરત છે. નિષ્ણાતોએ જણાવ્યું કે, કોરોનાથી સાજા થયેલા દર્દીઓ જો જાંઘ તથા હાડકામાં દુઃખાવાની સમસ્યાથી પીડાતા હોય તો આ બાબતને અવગણ્યા વગર તરત જ ડોક્ટરની સલાહ લેવી જરૂરી છે.