બોટાદ / રોજિદ ગામની માથાભારે બુટલેગર ગજુબેનના ઘરે પહોંચી VTVની ટીમ, જુઓ શું મળી આવ્યું

• VTV ન્યૂઝની ટીમ મહિલા બુટલેગર ગજુબેનના ઘરે પહોંચી 
• રોજિદ ગામના કેટલાક લોકોએ ગજુબેનના ઘરે પીધો હતો દારૂ
• ગજુબેનના ઘરેથી દારૂની ખાલી પોટલી મળી 

લઠ્ઠાકાંડને પગલે અસરગ્રસ્તોના ટપોટપ મોત નિપજતા બરવાળા-ધંધૂકાના કેટલાય ગામોમાં શોક અને આક્રંદની કાલીમાં પ્રસરી ગઈ છે. લઠ્ઠાકાંડમાં મૃત્યુઆંકનો ગોઝારો સિલસિલો અટકવાનું નામ જ નથી લેતો તેવામાં બોટાદ જિલ્લાના રોજિદ ગામે 11 અસરગ્રસ્ત લોકોના મોત નિપજતા ગામમાં હાહાકાર મચી જવા પામ્યો છે. જેને લઈને જેના નામ માત્રથી ગ્રામજનોમાં ફફડાટ છે તેવા આ કાંડમાં કશૂરવાર મહિલા બુટલેગર ગજુબેનના ઘરે VTV ન્યૂઝની ટીમ પહોંચી હતી. જયા ગજુબેનના ઘરેથી દારૂની ખાલી પોટલીઑ મળી આવી હતી.

મહિલા બુટલેગરના નામથી ગ્રામજનોમાં ફફડાટ
લઠ્ઠાકાંડને લઈને ગુજરાત આખું હચમચી ગયું છે. નશો કરવા ગયેલા 42 જેટલા લોકો મોતના મુખમાં ધકેલાતા બરવાળા-ધંધૂકાના પંથકમાં સનસનાટી મચી ગઇ છે. આ પ્રકરણને લઇને પોલીસ વિભાગના ઉચ્ચ અધિકારીઓ ઘટનાસ્થળે દોડી ગયા હતા. તેવામાં VTV ન્યૂઝની ટીમ રોજિદ ગામે મહિલા બુટલેગર ગજુબેનના ઘરે પહોંચી હતી. રોજિદ ગામના કેટલાક લોકોએ ગજુબેનના ઘરે જ દારૂનો નશો કર્યો હોવાનું જાણવા  મળ્યું હતું. જેના  બોલતા પુરાવા રૂપે ગજુબેનના ઘરેથી દારૂની ખાલી પોટલી મળી આવી હતી. વધુમાં મહિલા બુટલેગરે દારૂ વહેંચવા ઘરની બહાર LED લાઈટ પણ લગાવી હોવાનું પણ જાણવા મળ્યું હતું.

એક જ પરિવારના ત્રણ લોકોના મોતથી દયનીય સ્થિતિ
રોજીદ ગામનો પરમાર પરિવાર એક ઝાટકે વિખેરાઈ ગયો, એક જ પરિવારના 3 લોકો ઝેરી દારૂ પિતા મોતને ભેટયા છે. વશરામભાઇ પરમાર, શાંતિભાઈ અને દીપક પરમારે દમ તોડતા બાળકો નોંધારા બન્યા છે, આ પરમાર પરિવારમાં કમાવવા વાળો ઘરનો મોભી જતો રહ્યો છે અને ખાવા વાળા 2 બાળકો સહિત મૃતકની પત્ની, તેના માતા-પિતા છે જે ઘરડા છે કામ કરવાની સ્થિતિમાં નથી. આથી પરિવારની દયનીય સ્થિતિ થઇ છે.