- અમદાવાદના સરી ગામની પાણીની સમસ્યાનો મામલો
- VTVના અહેવાલ બાદ પ્રશાસન અલર્ટ
- GPCBના અધિકારીઓને પાણીના સેમ્પલ ચકાસવા કરાયા સૂચન
અમદાવાદના સરી ગામની પાણીની સમસ્યા મામલે VTV ન્યૂઝના અહેવાલ બાદ પ્રશાસન અલર્ટ મોડ પર આવી ગયું છે અને VTVના આ અહેવાલની પર્યાવરણ ભવને ખાસ નોંધ લીધી છે. આ મામલે ઉચ્ચકક્ષાએથી GPCBના અધિકારીઓને પાણીના સેમ્પલ ચકાસવા માટે સુચના આપી દેવામાં આવી છે. આથી GPCBની ટીમ અમદાવાદના સરી ગામે પહોંચી હતી અને ગાંધીનગરથી સૂચન બાદ ગ્રામ્ય GPCBના અધિકારીઓએ દોડી જઈને પાણીના સેમ્પલ લીધા હતા.
GPCBના અધિકારીઓને પાણીના સેમ્પલ ચકાસવા સુચના
ઉલેખનીય છે કે પર્યાવરણ વિદ પ્રફૂલ મહેતાએ પાણીના પ્રશ્ન મામલે ઘટસ્ફોટ કર્યો હતો અને કુવાના પાણીમાં TDSની ગંભીર માત્રા અંગે અવાજ ઉઠાવ્યો હતો. ત્યારબાદ VTV ન્યૂઝએ અહેવાલ પ્રસિદ્ધ કરતાં તંત્ર સફાળું જાગ્યું છે અને GPCBના અધિકારીઓને પાણીના સેમ્પલ ચકાસવા સહિતના જરૂરી પગલાં લેવા સુચના આપવામાં આવી છે.
શુ હતો સમગ્ર મામલો?
અમદાવાદના સાણંદ, બાવળા અને ધોળકાના ગ્રામ્ય વિસ્તારોના પાણીમાં ક્લોરાઈડ યુક્ત અને ભારે પ્રમાણમાં TDS ધરાવતું પાણી આવી રહ્યું છે. જે પાણી પીવા લાયક નથી. પણ સરી ગામના લોકો કૂવાનું ગંદુ પાણી પીવા માટે મજબૂર છે કેમ કે હજુ સુધી અહીં નર્મદા પાણી પહોંચ્યા નથી. સરી અને મટોડા ગામમાં છેલ્લા ઘણા સમયથી ભારે TDS અને ક્લોરાઈડ વાળુ પાણી કૂવામાંથી આવી રહ્યું છે. આ અંગે સ્થાનિક લોકોએ અનેકવાર પાણી પુરવઠા વિભાગ અને પ્રદૂષણ નિયંત્રણ બોર્ડમાં ફરિયાદ કરી છે પણ તંત્ર છે કે કાર્યવાહીમાં રસ દાખવતું નથી. અધિકારીઓના પેટનું પાણી નથી હલતું. સ્થાનિકોનો આક્ષેપ છે કે કેમિકલયુક્ત પાણી પીવાના કારણે ગ્રામજનોને કીડની, ચામડીના રોગ થાય છે. એટલું જ નહીં પીવા માટે બહારથી વેચાતુ પાણી મંગાવવું પડે છે. પણ ગરીબ લોકો દૂષિત પાણી પીવા મજબૂર બન્યા છે. સામાજિક કાર્યકર પ્રફૂલ મહેતાએ આ પાણીનો રિપોર્ટ કરાવ્યો હતો ત્યારે સામે આવ્યું કે કૂવાના પાણીની હાર્ડનેસ 200ના હોવી જોઈએ જે રિપોર્ટમાં 600 આવી છે. અને TDS 500ના સ્થાને 2 હજાર જેટલું નોંધાયું છે. કેલ્શયિમ 75 હોવું જોઈએ જેના બદલે રિપોર્ટમાં 200 આવ્યું છે. જે દર્શાવે છે કે પાણી પીવાલાયક છે જ નહીં. આ અંગેના અહેવાલ બાદ તંત્ર દોડતું થયુ છે.
