રોયલ ચેલેન્જર્સ બેંગ્લોરની ટ્રોફી કે ટાઇટલ જીતવા માટેની રાહ પૂરી થઈ ગઈ છે. સ્મૃતિ મંધાનાની ટીમે મહિલા પ્રીમિયર લીગ (WPL) 2024નું ટાઇટલ જીત્યું છે. અરુણ જેટલી સ્ટેડિયમમાં રમાયેલી ફાઈનલ મેચમાં RCBએ દિલ્હી કેપિટલ્સને 8 વિકેટે હરાવીને ટ્રોફી પર કબજો કર્યો હતો. ટીમની આ સફળતાથી RCB મેન્સ ટીમના સ્ટાર ખેલાડી વિરાટ કોહલી ખુશ હતો.
તાજેતરમાં ઇંગ્લેન્ડથી ભારત પરત ફરેલા કોહલીએ RCB ચેમ્પિયન બનતાની સાથે જ સ્મૃતિ મંધાના સહિત સમગ્ર ટીમને વીડિયો કોલ દ્વારા અભિનંદન પાઠવ્યા હતા. જેનો વિડીયો હાલ ઘણો વાયરલ થઈ રહ્યો છે. RCBની પ્રથમ ટ્રોફી જીત્યા બાદ વિરાટ કોહલી ખુશ દેખાઈ રહ્યો હતો. વિડિયો કોલ દ્વારા ટીમને અભિનંદન આપવા ઉપરાંત, તેણે સોશિયલ મીડિયા પર પણ તેના ખૂબ વખાણ કર્યા. પોતાની ઈન્સ્ટા સ્ટોરીમાં RCBના ચેમ્પિયનનું પોસ્ટર શેર કરતી વખતે કોહલીએ ટીમને અભિનંદન આપ્યા અને લખ્યું 'સુપરવુમન'. એટલું જ નહીં, તેણે ટ્વીટ કરીને ટીમના વખાણ પણ કર્યા હતા.
એ વાત તો જાણીતી જ છે કે રોયલ ચેલેન્જર્સ બેંગ્લોરની ફ્રેન્ચાઈઝીએ આ પહેલા કોઈ ટ્રોફી જીતી ન હતી. આરસીબી ત્રણ વખત આઈપીએલની ફાઇનલમાં પહોંચી છે, પરંતુ ટ્રોફી જીતવાનું તેમનું સપનું હજુ અધૂરું છે. સ્મૃતિ મંધાનાની ટીમે WPL ટાઈટલ જીતીને કરોડો RCB ચાહકોને ખુશ કરી દીધા છે.
વધુ વાંચો: ઐતિહાસિક: એક જ ટીમે તોડ્યાં આટલાં બધાં રેકોર્ડ્સ! WPLમાં પ્રથમવાર સર્જાઇ આવી ઘટના, જુઓ વિનર્સ લિસ્ટ
મહિલા પ્રીમિયર લીગ 2024ની ફાઇનલમાં RCBની જીત બાદ વિરાટ કોહલી વીડિયો કોલ પર મહિલા ટીમ સાથે જોડાયો હતો. આ દરમિયાન વિરાટ કોહલીએ ટીમ સાથે ડાન્સ કર્યો હતો અને સ્મૃતિ મંધાના સહિત સમગ્ર ટીમને જીત માટે અભિનંદન પાઠવ્યા હતા. વિરાટ કોહલીનો મહિલા ટીમ સાથે ડાન્સ કરતો વીડિયો સોશિયલ મીડિયા પર ખૂબ જ ઝડપથી વાયરલ થઈ રહ્યો છે. હવે ફેન્સ પણ આ વીડિયો પર ઘણી કોમેન્ટ કરી રહ્યા છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
